Premer-mınıstrdiń orynbasary Tamara Dúısenovanyń tóraǵalyǵymen áleýmettik áriptestik pen áleýmettik jáne eńbek qatynastaryn retteý jónindegi respýblıkalyq úshjaqty komıssııanyń otyrysy ótti. Oǵan ortalyq memlekettik organdar, kásipodaqtar birlestikteriniń, jumys berýshiler odaǵynyń ókilderi jáne oblys ákimderiniń orynbasarlary qatysty.
Jıyn barysynda eldegi eńbek salasynyń jaı-kúıi talqylandy. Atqarylǵan sharalar jóninde Eńbek jáne halyqty áleýmettik qorǵaý mınıstriniń birinshi orynbasary Aqmádı Sarbasov baıandady. Byltyr ınspektorlar 7 myńǵa jýyq tekserý jumystaryn júrgizip, anyqtalǵan olqylyqtardy joıý boıynsha 4 myńnan asa nusqama berdi. 400 mln teńgeden astam somaǵa 2 400 aıyppul salyndy.
Búginde 31 kásiporynnyń 1,6 myń jumysshy aldynda bereshegi bar. Jalpy somasy 700 mln teńgege jýyqtaıdy. Olardyń eń kóbi Shyǵys Qazaqstan, Qostanaı oblystary men Almaty qalasynda anyqtalǵan. Odan bólek bankrot dep tanylǵan 44 nysannyń 913 mln teńge qaryzy bar.
1 aqpandaǵy jaǵdaı boıynsha eldegi kásiporyndarda 106 adam jaraqat aldy. Tamara Dúısenova múddeli memlekettik organdar men oblys ákimdikterine jumys oryndaryndaǵy jaǵdaıǵa baqylaýdy kúsheıtip, jaraqat alý oqıǵalarynyń aldyn alý boıynsha tıisti sharalar qabyldaýdy tapsyrdy.
Sonymen qatar vıse-premer eńbek daýlary men jumys berýshilerdiń otandyq jáne sheteldik jumysshylar úshin teń jaǵdaı jasaýyn, eńbekaqy tóleýge baılanysty talaptardy saqtaýyn baqylaý qajettigine de mán berdi. Jyldyń basynda mınıstrliktiń ahýal ortalyǵynda 106 kásiporyn monıtorıngte bolǵan. Onyń birazynda eńbek daýlary sheshimin taýyp, baqylaýda 62-si qaldy. Onyń ishinde árbir úshinshisi – Mańǵystaý oblysynda.
Osy oraıda aımaq basshysynyń orynbasary Qanat Quljanov osy baǵytta atqarylyp jatqan sharýalar týraly baıandady.
Al respýblıkalyq kásipodaqtar federasııasynyń tóraǵasy Satybaldy Dáýletalın mundaı jaǵdaılar kóbine kásipodaǵy joq mekemelerde bolatynyn alǵa tartty.
«Eńbek daýlaryn sheshýde saldarymen emes, sebebimen kúresken jón. Bul rette jumys berýshiler men kásipodaq birlestikteri iske atsalysýy kerek. Kez kelgen máselede ortaq sheshimge kelýge bolady. Ol úshin nıet bolýy kerek. Sondyqtan salalyq uıymdardy eldegi eńbek máselelerine beıjaı qaramaı, sheshýge aralasýǵa shaqyramyn», – dep atap ótti Tamara Dúısenova.
Azamattar úshin jaıly eńbek jaǵdaıyn qalyptastyrýda memlekettik organdar, jumys berýshiler men kásipodaq uıymdarynyń ózara birlesken sharalar qabyldaýy mańyzdy. Osy oraıda taraptardyń mindetterin aıqyndaıtyn bas kelisimge qol qoıyldy.
Aldaǵy 3 jylǵa arnalǵan jańa qujattyń jobasyn Eńbek jáne halyqty áleýmettik qorǵaý mınıstrligi janynan qurylǵan jumys toby ázirledi. 10 tarmaqtan turatyn kelisim 2030 jylǵa deıingi «Eńbek qaýipsizdigi» jáne «Eńbek naryǵyn damytý» jónindegi tujyrymdamalarda kórsetilgen talaptardy eskergen. Vıse-premer bul qujattyń negizgi mindeti azamattardy sapaly jumys oryndarymen qamtamasyz etýge jaǵdaı jasaý ekenine erekshe mán berdi.