Taldaý mektebiniń úshinshi kezeńi aıaqtaldy. Osyǵan oraı qatysýshylar jumystaryn qorytyndylap, Ornyqty damý maqsattaryna qol jetkizýge arnalǵan 13 baıandamany kópshilikke tanystyrdy.
Osydan úsh jyl buryn Senat janyndaǵy Jas sarapshylar klýbynyń bastamasymen jáne Palata tóraǵasy Máýlen Áshimbaevtyń qoldaýymen qolǵa alynǵan «Taldaý mektebi» qoǵamdyq jobasy otandyq jáne halyqaralyq sarapshylar tarapynan joǵary baǵa aldy. Úshinshi kezeńniń qorytyndy dárisi men trenıngke BUU-nyń Qazaqstandaǵy turaqty úılestirýshisi Mıkaela Frıberg-Storı arnaıy meıman retinde qatysty.
Osy joly elimizdiń óńirlerinen kelgen jas sarapshylar belsendi qatysty. Bul úshinshi kezeńdegi erekshelikterdiń biri boldy. Olar eki aı boıy analıtıkalyq materıal daıyndaý boıynsha bilim alyp, osy baǵyttaǵy daǵdylaryn jetildirdi. Osylaısha, atalǵan alań otandyq jáne sheteldik bilikti sarapshylarmen birlesip jumys isteýdiń jańa múmkindikterine jol ashty.
Aldyńǵy jyldardaǵydaı bul kezeńde de oqytý kýrsy teorııalyq jáne tájirıbelik baǵytta júrgizildi. Belgili otandyq jáne sheteldik sarapshylar dáris oqydy. Olar túrli analıtıkalyq ádister men tásilder týraly aıtyp, sheberlik sabaqtary men trenıngter ótkizdi. Sondaı-aq mektep qatysýshylary mınıstrlermen jáne ortalyq memlekettik organdardyń basshylarymen iskerlik lanch formatynda kezdesti.
Senat tóraǵasy komandalyq jobalardy qorytyndylaı kele baıandamalardyń joǵary deńgeıde ázirlengenine, olardyń ózektiligine, qorytyndylar men usynymdardyń júıeliligi men mazmunyna erekshe nazar aýdardy. Máýlen Áshimbaev atap ótkendeı, bul rette Taldaý mektebiniń komandalarymen jumysty utymdy úılestire bilgen tálimgerler mańyzdy ról atqardy.
«Bıyl jobanyń birqatar ereksheligi boldy. Olardyń biri qatysýshylardyń joǵary deńgeıdegi belsendiligi men úılesimdi komandalyq jumys ekeni anyq. Bul – ár qatysýshy men mentordyń qajyrly eńbeginiń nátıjesi. Tálimgerler ózderine artylǵan jaýapkershilikti sezinip, aptasyna keminde 15 saǵat ýaqyt bóldi. Olar ózderiniń bilimderimen, tájirıbelerimen bólisti, kezdesýler uıymdastyrýǵa qoldaý kórsetti jáne baıandamalar daıyndaý úshin baǵdar berdi. Tálimgerlik degenimiz – oqytý jáne kásibı daǵdylardy arttyrý baǵytyndaǵy mańyzdy ınstıtýt. Sizdermen 24 tájirıbeli dárisker jáne 13 tálimger jumys istedi. Olardyń kásibı biliktilikteriniń qandaı deńgeıde ekenine ózderińiz de kóz jetkizdińizder», degen Máýlen Áshimbaev jobaǵa qatysqan mentorlarǵa alǵys bildirdi.
Kýrs 7 negizgi modýldi qamtydy. Komandalardyń qorytyndy jumystary kedeılikti joıý, densaýlyq saqtaý jáne ál-aýqatty arttyrý, sapaly bilim berý, taza sý jáne sanıtarııa, laıyqty jumys, sondaı-aq ekonomıkalyq ósý sııaqty taqyryptardy qamtıtyn Ornyqty damýdyń bes maqsatyna arnaldy. Máýlen Áshimbaev bul maqsattar Qazaqstanda erikti sholý aıasynda júrgizilgen saýalnama nátıjesinde basym mindetter retinde anyqtalǵanyn jáne ol BUU-da tanystyrylǵanyn atap ótti.
Sonymen qatar bıyl qatysýshylardyń, tálimgerlerdiń jáne sarapshy-dáriskerlerdiń ózara is-qımylyna qyzyǵýshylyqtyń artýyna baılanysty sabaqtardyń uzaqtyǵy eki esege ulǵaıtyldy.
«Eki aı óte qarqyndy ótti. Aldaǵy ýaqytta Senat janyndaǵy Jas sarapshylar klýbymen birlese otyryp, sizderdiń baıandamalaryńyzdyń jınaǵyn shyǵaramyz. Basqa da birqatar jobalarymyz bar. Osy rette barlyq baıandamanyń mazmuny joǵary deńgeıde ekenin atap ótkim keledi. Olar bir jınaqta jarııalanyp, jumys úshin Senat depýtattaryna jáne salalyq memlekettik organdarǵa beriledi», degen Máýlen Áshimbaev qatysýshylardy kýrstyń sátti aıaqtalýymen quttyqtap, Parlamenttiń zań shyǵarý qyzmeti aıasynda ózara is-qımyl jalǵasa beretinin aıtty.
Úshinshi kezeńniń sońǵy kúninde Nazarbaev ýnıversıtetiniń Aqyldy júıeler jáne jasandy ıntellekt ınstıtýtynyń dırektory Hýseın Atakal Varol men jasandy ıntellekt mektebiniń negizin qalaýshylardyń biri Nık Makflaı dáris oqydy.
Joba barysynda oqylǵan dáristerdiń beınenusqasy Taldaý mektebiniń resmı YouTube arnasyna jarııalanady.