Halyqaralyq áıelder kúnine oraı kópbalaly analarǵa bir rettik materıaldyq tólem beriledi. Alaıda járdemaqy búkil el aýmaǵyn qamtymaıdy. Tek 5 oblystyń ákimdigi «Altyn alqa», «Kúmis alqa» ıelengen batyr analarǵa qarjylaı quttyqtaý joldamaq. Járdemaqynyń jıyntyǵy óńirlerdiń bıýdjetine qaraı ártúrli esepteledi, dep jazady Egemen.kz 1tvkz-ke silteme jasap.
Máselen, Abaı oblysynyń ákimdigi 19 myń anaǵa, Shyǵys Qazaqstan oblysynyń shendileri 4 baladan kóp otbasylarǵa, I, II dárejeli ana dańqyn ıelengen kelinshekterge 15 000 teńge kóleminde járdemaqy tóleýdi josparlap otyr.
Pavlodar oblysynyń aq jaǵalylary da analarǵa 5 aılyq eseptik kórsetkish kóleminde qarjylaı qoldaý kórsetpek.
Osyndaı syıdy Qaraǵandy oblysyndaǵy 7 000 áıel alsa, Soltústik Qazaqstan aımaǵyndaǵy 7600-ge jýyq kópbalaly analarǵa 18 000 - 36 000 teńge aralyǵynda bir jolǵy járdemaqy tólenedi.
Kópbalaly otbasylar tiziminde kósh bastap turǵan Túrkistan oblysy ákimdigi 42 250 anaǵa materıaldyq syı jasaıdy.
Jaýaptylar bir rettik járdemaqy 7 naýryzǵa deıin analardyń esepshotyna túsetinin habarlady.
Al ózge aımaqtyń atqa minerleri bul taqyrypta ún qatpady.