Bıyl, ıaǵnı 2024 jyldyń alǵashqy eki aıynda otandastarymyz Qazaqstandaǵy jer silkinisi men basqa da apatty jaǵdaılardan 855 jyljymaıtyn múlikti saqtandyrǵan. Máselen, byltyr dál osy aralyqta 482 nysan ǵana saqtandyrylsa, bul kórsetkish ótken jylmen salystyrǵanda 77,3%-ǵa ósip otyr. Alaıda, jekelegen azamattardyń múlikterin saqtandyrý deńgeıi búkil elde áli de baıaý júrip jatyr, dep jazady Egemen.kz.
Ulttyq statıstıka bıýrosynyń málimeti boıynsha, 2023 jyldyń aıaǵynda Qazaqstanda barlyǵy 2,52 mıllıon jyljymaıtyn múlik nysany, onyń ishinde 307,9 myń kóppáterli turǵyn úı tirkelgen. Onyń 170,28 myńy Almaty qalasynda bolsa, 267,1 myńy Almaty oblysynda – elimizdiń jer silkinisine eń qaýipti aımaqtarynda ornalasqan.
Eń qyzyǵy, saqtandyrylǵan turǵyn úıler sany jaǵynan Astana qalasy kósh bastap tur. Jańa saqtandyrý sharttarynyń jartysy – 50,4%, ıaǵnı elordanyń úlesinde, al Almaty qalasynyń úlesi nebári – 14,85%.
«Qazirgi tańda Qazaqstanda barlyq jyljymaıtyn múliktiń 2%-dan azy saqtandyrylǵan. Elimizdiń 40%-ǵa jýyǵy seısmıkalyq aımaqta ornalasqanymen, azamattar saqtandyrýdyń mańyzdylyǵyna áli de mán bermeıdi. Qańtardaǵy Almatydaǵy jer silkinisi kópshilikti polıs satyp alý týraly oılanýǵa májbúrlegenimen, bizdiń baılanys ortalyǵyna habarlasqandardyń 6-7%-y ǵana kelip, múlkin saqtandyrdy», deıdi «Evrazııa» SK basqarma tóraǵasynyń orynbasary Nurjan Jantóreev.
Sonymen qatar bıznes jyljymaıtyn múlikti apatty táýekelderden qorǵaýǵa asa jaýapkershilikpen qaraıdy. Qańtar-aqpan aılarynda zańdy tulǵalar arasynda apattyq táýekelderden múlikti saqtandyrý sharttarynyń sany ótken jyldyń sáıkes kezeńimen salystyrǵanda 4,1%-ǵa ósken. 2023 jyldyń eki aıynda zańdy tulǵalardyń óndirip alǵan jarnalarynyń mólsheri jeke tulǵalardyń kelisim-sharttary boıynsha jınalǵan syıaqylardan 740 ese asyp tústi, 2024 jyldyń eki aıynda alshaqtyq 593 esege deıin azaıǵanymen, óte joǵary deńgeıde qalyp otyr.
«Almatydaǵy sońǵy ýaqytta bolǵan jer silkinisteri saqtandyrýǵa degen múddelestikti arttyrdy, alaıda bul ósimge biz baza tómendiginiń esebinen qol jetkizip otyrmyz. Turǵynúılerdiń basym bóligi ıpotekalyq nesıeleý sheńberinde saqtandyrylǵan. Jalpy, erikti túrde múliktik saqtandyrýdyń etek jaıýy, úırenshikti daǵdyǵa aınalý deńgeıi óte tómen. Almatyda nemese basqa da iri eldi-mekenderde qýatty jer silkinisi bolǵan jaǵdaıda memleketke, onyń bıýdjeti men qorymyzǵa orasan zor salmaq túsetini belgili», deıdi «Evrazııa» SK ókili.
Ádette, jyljymaıtyn múlikti saqtandyrý kelisimsharty 12 aıǵa jasalatynyn eske sala keteıik.