Qyz zorlady dep aıyptalǵan Taldyqorǵan qalalyq polısııa basqarmasynyń burynǵy basshysy Marat Kúshtibaevty sot zalynan jedel járdem kóligimen alyp ketti, dep habarlaıdy Egemen.kz.
Oqıǵanyń vıdeosy aldymen áleýmettik jelilerde paıda boldy. Zembilmen kóterip ketip bara jatqan adamnyń Marat Kúshtibaev ekeni aıtylǵan.
«Jetisý oblystyq sotynyń baspasóz qyzmeti sot otyrysy kezinde aıyptalýshy K.-ny jedel járdem kóligimen alyp ketkeni týraly aqparatty rastaıdy. Qazirgi ýaqytta ol kardıologııalyq ortalyqta dárigerlerdiń baqylaýynda. Osyǵan baılanysty sot otyrysy keıinge qaldyryldy», dep túsindirdi Jetisý oblystyq sottan.
Eske salaıyq, ótken jyly qarashada Taldyqorǵan qalalyq polısııa basqarmasynyń burynǵy bastyǵy Marat Kúshtibaev 27 jastaǵy qyzdy zorlady degen kúdikpen ustaldy.
Oǵan qatysty Qylmystyq kodekstiń 120-baby 2-bóligi (Qyzmettik mindetterin oryndaý kezinde jasaǵan zorlaý) boıynsha qylmystyq is qozǵaldy. Keıin ol eki aıǵa qamaýǵa alyndy.