Qaraǵandyda tártip saqshylary ınsýlt alyp, esinen tanyp qalǵan júrgizýshini qutqardy, dep habarlaıdy Egemen.kz.
Polisia.kz-tiń málim etýinshe, 8 naýryz kúni patrýldik ınspektorlar Aqjarken Muqajan men Berik Keńesovke 19-yqsham aýdannyń qıylysynda tótenshe jaǵdaı bolǵany týraly habarlanǵan.
Eki ınspektor oqıǵa ornyna kelgen ýaqytta qıylysta jol shetindegi bordıýrǵa shyǵyp bir dóńgelegi aınalyp otalyp turǵan kólikti kórgen.
«Kóliktiń barlyq esigi buǵattalyp qalǵan eken. Kóliktiń aldyńǵy jolaýshy otyratyn terezesin syndyryp ishke kirdim. Áriptesim ekeýmiz ony syrtqa shyǵardyq. Júrgizýshiniń denesi qurysyp, tilin jutyp qoıatyndaı bolyp jatty. Oǵan alǵashqy medısınalyq kómek kórsetip, demala bastaǵanda qyzmettik kólikpen aýrýhanaǵa jetkizdik», dedi Aqjarken Muqajan.
Anyqtalǵandaı, kólik júrgizýshi ınsýlt alǵan. Dárigerler qazirgi ýaqytta onyń densaýlyǵy qalypty ekenin jetkizdi.