О́mirdiń qaltarys-bultarystarynda eki qolǵa bir kúrek tabylsa dep nıettengen azamattar keı-keıde sol sertin berik ustanady. Ýaqyt sátimen sharýaǵa ábden mashyqtanyp, salanyń oı-shuqyryna úńilgender bógde maqsat-murattyń jetegine ilesip te jatady. Astana qalasyndaǵy tazalyqqa jaýapty mekemede tabandy eńbek etip júrgen Baýyrjan Bıgeldınov te árneniń basyn bir shalmaı, birden durys baǵytty tańdaǵanyn keıinirek túsingen.
Baýyrjan Bıgeldınov 2006 jyly ákesi Oıratpen birge Kókshetaýdan Astanaǵa jumys isteýge kelgen. Ol kez qazirgideı oıyn-saýyq, saýda oryndary kóp emes, smartfon atymen joq. Qyzmet kórsetý salasy jetilmegen. Sol jyly tehnıkadan habary bar Oıratqa birden jumys tabylsa, 21 jasqa keshe tolǵan Baýyrjan qol qýsyryp otyrmaı, tazalyqqa jaýapty mekemege jumysqa ornalasqan. Sondaǵy kózdegeni mekemede birer jyl ýaqytsha jumys istep, aıaqqa turyp alǵan soń, basqa salaǵa aýysý edi. Baýyrjan jumysqa birden kirisip, jol boıyndaǵy súrilgen-búlingen asfalt, bordıýrlardy jamap-jasqap, qystygúni qar tazalaıtyn toppen birge eńbek etken. Tek 2008 jyly mekemeniń ataýy «Astana tazalyq» seriktestigi bolyp ózgergen soń, asfalt, bordıýrdyń sharýasy basqa kompanııaǵa júktelgen.
– Áne-mine degenshe jumysta biraz shırap, ysylǵan soń, 2008 jyly basshylyq mehanıkalyq tazalaý tobyna brıgadır bolýdy usyndy. Birer jyl osynda jumys istep, keıin basqa salaǵa aýysam degen oıymnan aınydym. Keıin avtogreıderde sheber boldym. Ýchaske bastyǵy, qolmen jınaý jónindegi sheber qyzmetin de atqardym. Sodan 2017 jyly Almaty aýdanynan Esil aýdanyna jumys aýystyryp, qolmen jınaý jónindegi sheber atandym. 2019 jyly bas dırektor shaqyrtyp, maǵan Esil aýdanynyń ýchaske basshysy bolýdy usyndy. Ýchaske basshysynyń jumysynan habarym bolǵan soń, birden kelise kettim. Qazir ózimizge júktelgen tapsyrmany kúndelikti adal, laıyqty oryndaýǵa barynsha tyrysyp júrgen jaıymyz bar. Bizdiń ýchaskede 10 sheber, 13 brıgadır, 250-ge shamalas jumysshy eńbek etedi. Esildiń sol jaǵalaýy bolǵan soń jumys qaýyrt. Tańerteń 6.00-de jumysty bastap, keshki 17.00-ge deıin baıyz tappaımyz, – deıdi B.Bıgeldınov.
Baýyrjan Kókshetaýda zańger mamandyǵy boıynsha áýeli kolledjde oqyp, keıin Joǵary oqý ornynda syrttaı bilim alǵan. «Astana tazalyq» seriktestiginde osyǵan deıin ákesi men inisi jumys istese, qazir anasy osynda jol jumysshysy bolyp eńbek etip júr. Bir sózben aıtqanda, birligi jarasqan otbasy múshelerine tazalyqqa jaýapty mekemeniń tynys-tirshiligi tańsyq emes.
Sondaı-aq mekemede 10-15 jyldaı jumys istep, zeınetke shyǵyp jatqandar da kóp eken. Jastar jaǵy bolsa, qysta tazalyqqa jaýapty mekemege ýaqytsha jumysqa kelip, kóktem shyǵa ózderiniń maýsymdyq jumystaryna attanady eken. Jumysshylardyń kóbi Astanaǵa irgeles jáne qashyq aýyldardan keledi. Olarǵa mekeme arnaıy marshrýt bekitken. Sol sebepti de keıbir qashyq aýyldan qatynaıtyn jumysshylar keıde túngi 2.00-den bastap jumysqa qamdana bastaıtyn kórinedi.
– Qazir bizdegi tehnıkalardyń kóbi – jańa. Jyl saıyn aýystyryp, tolyqtyryp otyrady. Bıyl jumysshylardyń jalaqysy 20 paıyzǵa kóterilgeni abyroı boldy. Iá, jumysqa jastar kóp kele bermeıdi. Onyń ústine bizdiń ýchaskedegi jumysshylardyń shamamen 60 paıyzy – áıelder. Jyldar boıy eńbek etip, brıgadır, sheber bolǵan kelinshekter bar. Jaqyn aýyl bolsa meıli, Qaraǵandy oblysyna qarasty aýyldan keletinder kóp. Olardy tasymaldaıtyn kólikter bekitilgen. Jumysshylar túski aspen qamtylǵan. Qazir basshylyq qyzmetke aýysqan azamattardyń barlyǵy derlik burynnan osy mekemede jumys istep, eńbegi sińgen azamattar dep aıtar edim. Jumys ońaı emes. О́zim ýchaskede jol jumysyna, qolmen jınaıtyn topqa jaýap beremin. Jumysshylarǵa, tehnıkalarǵa jaýaptymyz. Mysaly, búgin 5.30-da barlyǵymyz jınaldyq. Men de erterek oıanyp, áýeli túngi aýysymda tazalaǵan kóshelerdi sharlap shyqtym. Sosyn taǵy kún tártibin bekitip, sheberlermen kezdesip, tapsyrmany naqtyladyq. Kúnde – osy tirshilik. Jazdygúni oıyn-saýyq saýda ortalyqtarynyń mańynda qoqys kóbeıedi. Ony bizdiń jumysshylar ýaqtyly jınap alady. Qalanyń ózi taza bolǵan soń, turǵyndardyń da kósheni lastamaýǵa tyrysatynyn baıqaımyz. Birli-ekili jaǵdaılar bolmasa, qala turǵyndary tazalyqqa jaqyn. Jumysshylar kúndelikti óziniń jumysyn atqara beredi ǵoı. Áıtkenmen «Tazalyq – tazalanǵan jerde emes, tazalyq saqtaǵan jerde bolady» degen. Sondyqtan biz de qala turǵyndaryn tazalyq saqtaýǵa shaqyrýdan jalyqpaımyz, – deıdi ýchaske basshysy B.Bıgeldınov.
Otbasynda bes bala tárbıelep otyrǵan Baýyrjan birneshe jyl buryn memlekettik baǵdarlama sheńberinde úıli bolypty. Qala tazalyǵyna kún-tún demeı, asqan jaýapkershilikpen kirisip júrgen ana men uldyń jumysy tabysty bolsyn destik.