Jýrnalıst Aǵabek Qonarbaıulynyń «Shynaıy ómirde bolǵan oı salar oqıǵalar» kitaby jaryq kórdi. Respýblıkalyq «Aıqyn», «Dala men qala», «Jas qazaq» gazetterinde maqalalary jarııalanyp, kóziqaraqty kópshilikke qaýymǵa esim-soıy keńinen tanylǵan Aǵabektiń bul – ekinshi kitaby. Buǵan deıin «Mashaqat pen marapat» kitaby da kópshiliktiń ystyq yqylasyna kenelgen edi.
«Kitap jazýdyń óz jaýapkershiligi, salmaǵy bar. Oqıǵalardyń shynaıylyǵyna kóz jetkizý maqsatynda birneshe qalaǵa barýǵa týra keldi. Keıipkerdiń ózimen nemese senimdi kýágermen kezdesip, ǵıbratty oqıǵalardy boıamasyz jetkizýge, taǵylymy mol jaıttardy baıandaýǵa tyrystyq», – deıdi avtor.
Ataýy áıgilegendeı, eki jyldyq tabandy eńbeginiń óteýine jaryq kórgen kitabynda avtor ómirde kórgen ǵıbratty oqıǵalardan alǵan ónegesin baıandaıdy. Qoǵamda setinep bara jatqan baýyrmaldyq pen qaıyrymdylyq qasıet týrasynda tolǵaǵan ár oqıǵanyń aparar uıyǵy bireý ǵana – izgi amal.
Abdýlla ıbn Múbaraktyń «az amaldy nıet kóbeıtedi, kóp amaldy nıet azaıtady» degeni tegin emes. Kóp adamnyń aq adal nıetine boı kótergen meshit týrasynda, batyr Baýyrjan Momyshulynyń óz páterin qart ájeıge bergen márttigi, ekinshi dúnıejúzilik soǵysta 300-den asa áskerı tapsyrmany oryndap, áýege ushqan Keńes Odaǵynyń eki dúrkin Batyry atanǵan jalǵyz qazaq Talǵat Bıgeldınovtiń ajaldan qorǵanǵan amaly, Qunanbaı qajynyń Qarqaralyda bóreneden qıyp saldyrǵan meshitiniń murty da buzylmaı búginge deıin qalaı saqtalǵany jóninde osy kitapta aıtylady. Tup-týra bir ǵasyr buryn, 1924 jyly sholaq belsendiler Abaıdyń ákesi saldyrǵan Allanyń úıin órteý pıǵylymen birneshe ret ot qoıǵan. Osyndaı qysastyń talaıyn kórgen meshittiń bútin saqtalýy da qamqor jandardyń izgi amalynan ekenin avtor tereńdeı tolǵaıdy.