Dalada áli de qar jatqanymen kóktemniń lebi seziledi. Kóktemge tán ıis, dybys, shýaq bar. Bıyl bul mezgil burnaǵylardan ózgerek. Osy jyly qasıetti Ramazan aıy Naýryz merekesimen tuspa-tus kelip otyr. Jańarý men tazalyqtyń, meıirim men izgiliktiń aıy sanalatyn bul ekeýiniń qazaq úshin máni de, mańyzy da zor. Jyldyń jańaryp, kún men túnniń teńeler shaǵy da osy kezeń. Tarıhtan tamyr tartqan Áz Naýryzdy halqymyz bir kún emes, tutas aı boıy toılaıdy. Al onyń 14 naýryz – Amal, kórisý merekesinen bastalýy tegin bolmasa kerek.
Qystan aman shyqqan halyqtyń bir-birimen máre-sáre bolyp júzdesetin Kórisý kúniniń shyn máninde shapaǵaty mol. Amal – ár adamnyń jaqynyna jyly sóz aıtyp, jyl saıyn bir-birimen amandyqta júzdesýin tileıtin saýap meıramy. Bul kúni jasy kishiler úlken kisilerge arnaıy at basyn buryp, sálem beredi, batasyn alady. Osyndaı ıgi ǵurypty jalǵap Internet-redaksııa bóliminiń qyz-jigitteri «Egemen Qazaqstan» gazetinde uzaq jyldar boıy qyzmet etken ardager jýrnalıst Janat Elshibek aǵamyzdyń úıine arnaıy bardyq. Aǵamyz bizdi jyly shyraımen qarsy aldy. Esikten úıge kire sala úıdegilerdiń keńpeıildi kóńiliniń ózi bizdi qýanyshqa bóledi. Úıindegiler degenim, qalamgerdiń uly men kelini, nemereleri edi. Al jeńgemiz bul kúni jumysta eken.
О́zin arnaıy izdep kelgenimizge rızashylyǵyn bildirgen ardager jýrnalıst áńgimesin jýrnalıstıka tóńireginde bastady. Al biz uıyp tyńdaı berdik. Jastardy kórip, jastyq shaǵy eske tústi me eken dep te topshyladyq. Jýrnalıstıkadaǵy sara joly qalaı bastalǵanynan bastap túrli qyzyqty estelikterin aıtyp berdi. «Jaýqazyn», «Qarlyǵash», «Qosh bol, teńiz…», «Ýaqyt-synap», «Taǵdyr jeli» syndy týyndylardyń avtory qazir «Jýrnalıstıka jumbaǵy» atty kitap jazyp jatyr eken. Bul shyǵarma da buıyrtsa oqyrmannyń ystyq yqylasyna keneleri anyq.
Budan soń bárimiz dastarqan basyna jaıǵastyq. Kórisý kúni qazan tolyp, dastarqannyń túrli tátti-dámdimen jaınap turǵany arqa-jarqa bolǵan aǵaıynnyń qýanyshyn eseleı túskendeı kórindi. Osydan-aq bul otbasynyń Naýryzdy toılaýǵa erekshe mán beretinin ańǵardyq. Qalamger de bul ulyq meıramnyń mán-mańyzy týraly aıta otyrdy.
«Qazaq ejelden Naýryz merekesin toılaǵan. Biraq Uly derjava salt dástúrimizdi tyıyp otyrǵan sátter de boldy. Onyń ózin eseıip qalǵan bizdiń ózimiz keıin bildik. Onyń bári qıturqy saıasattyń joly eken. Al keıin óz aldyna táýelsiz el bolǵaly mereke esh tyıymsyz toılana bastady. Alaıda táýelsiz el bolǵanymyzǵa otyz jyldan astam ýaqyt ótse de Naýryz áli de oıdaǵydaı toılanyp jatqan joq. Iá, qazir eshkim eshkimniń qolyn baılap, ıdeıasyn joqqa shyǵarmaıdy. Áz Naýryzdy óz bıiginde toılaýdy damytý – ár urpaqtyń maqsat-múddesi», dedi J.Elshibek.
Budan soń ol Kórisý kúni aǵaıyn arasyndaǵy eski ókpe-renish keshirilip, arazdyq umytylatynyn, bul kúni tabıǵatpen birge adam jany da jańaryp, tazaryp muntazdaı kúıge túsetinin aıtty. «Alty aı boıy qys bolatyn óńirlerde Kún men Aı teńesip, jer dúnıe kógergende Samarqannyń kók tasy jibıdi. Osy bir ýaqytta el qystaýdan shyǵyp, kórshilerine, aǵaıyn-jekjattaryna baryp sálem beredi. Kórisý aǵaıynnyń osylaısha aman-saýlyǵyn suraý ıdeıasynan shyqqan. Sońǵy jyldary bul jaqsy úrdiske aınaldy. Naýryzdyń 14-inen bastalatyn kórisý kúni – baýyrmaldyq pen tatý-tátti yqylastyń sımvoly. Halyq Amal merekesinen bastap on shaqty kún túrli is-shara uıymdastyrǵan. Mysaly eńbek, týǵan jer, dostyq, qolóner, dástúr, salt-ǵuryptarymyzdy órkendetý taqyryptarynda júıeli túrde toılanyp keledi. Al osyǵan muryndyq bolý ár urpaqtyń mindeti», dedi ol.
«Jaqsy adammen ótkizgen jarty saǵat, jamanmen ótkizgen myń kúnge tatymas» degendeı qalamgerdiń qasynda ótken eki saǵatymyz zymyraı óte shyqty. Az ýaqyttyń ishinde biraz taǵylymdy dúnıege qanyqtyq. Aǵamyzdyń batasyn alyp, kezekti kezekshiligimizdi atqarýǵa kettik.