Senattyń Halyqaralyq qatynastar, qorǵanys jáne qaýipsizdik komıtetiniń depýtattary «Analar júregi» sarbazdar analary komıteti» respýblıkalyq qoǵamdyq birlestiginiń ókilderimen kezdesti. Kezdesýge qatysýshylar áskerı qyzmet jaǵdaıyn odan ári jaqsartý máselesin talqylady, dep habarlaıdy Egemen.kz Senattyń baspasóz qyzmetine silteme jasap.
Komıtet múshesi Ǵalıasqar Sarybaev Otandy qorǵaý jolyndaǵy áskerı qyzmetshilerdiń aman-esen jáne deni saý qalpynda úılerine qaıtýynyń mańyzdylyǵyn atap ótti.
«Sońǵy ýaqytta armııadaǵy jaǵymsyz qubylystardyń aldyn alý sharalary qabyldanýda. Jastar arasynda áskerı boryshyn oryndaýǵa yntalandyrýdy arttyrý úshin birqatar jeńildik júzege asýda. Alda áli talaı jumys bar. Jastarǵa áskerı-patrıottyq tárbıe berý, Qazaqstan armııasynyń abyroı-bedelin kóterý mindeti kezek kúttirmeıdi. Bul máseleler boıynsha birlestik atqaratyn jumys aýqymdy», dedi Ǵalıasqar Sarybaev.
«Analar júregi» respýblıkalyq qoǵamdyq birlestiginiń ókilderi áskerı qyzmet kezeńinde adam quqyqtarynyń buzylýyn, qyzmetshilerdiń qaza bolýy men jaraqat alýyn boldyrmaý maqsatynda áskerı organdar men áskerı bólimderdiń basshylyǵymen baılanys ornatýdaǵy kómegi týraly aıtyp berdi. Komıtet zańda belgilengen tártippen adam quqyqtaryn saqtaý maqsatynda shaqyrý komıssııalarynyń jumysyna qatysady, sondaı-aq áskerı qyzmet ótetin jaǵdaılardy jarııalaý úshin buqaralyq aqparat quraldarymen birlese áreket etedi.