Qosshy qalasynan jetkizilgen kóshpeli kórmede eki jarym ǵasyrdan astam ýaqyt buryn jasalǵan kóne dombyra, ultymyzdyń túrli aspaptary, Qanysh Sátbaev ustaǵan dombyranyń kóshirmesi qoıyldy.
Aqmola oblysy Qosshy qalasynyń mádenıet úıine qarasty ulttyq aspaptar mýzeıiniń qorynda saqtalǵan kóne aspaptardyń uzyn sany 1600-den asatyn kórinedi. Mýzeı basshysy Azamat Baqııa ádette kózimiz kórip úırengen ulttyq aspaptardan bólek, jelbýaz, ýildek, tastaýyq, úskirik, qussaıraýyq, shyńyraý, qossaz, qosýildek, tulypsyrnaı, kerneı, ura, buǵyshaq aspaptarynyń árqaısysynyń ereksheligine toqtaldy. Kóbi kórmek túgili, atyn estimegen saz buıymdary. Aıtýynsha, kez kelgen adam sazsyrnaıda 5-7 mınýtta oınap úırene alady. «Sazsyrnaı aspaby jas balalar úshin óte paıdaly. Munda 6 oıyq – 6 nota bar. Al balalar qolynan tastamaıtyn smartfonda budan da kóp kombınasııa jasaıdy. Birinshiden, úrmeli aspap ókpege paıdaly. Ekinshiden, qoldyń matorıkasyn damytýǵa óte yńǵaıly», deıdi etnograf.
Kórmedegi eń kóne jádigerlerdiń biri – 223 jyl buryn jasalǵan dombyra. Onyń bet taqtaıy 1960 jyldary aýystyrylǵan eken. Al akademık Qanysh Sátbaev ustaǵan dombyranyń kóshirmesi áıgili jerles ǵalym týraly fılmde paıdalanylǵan.
Kelýshilerdi erekshe qyzyqtyrǵan jádiger – jolbarystyń únin aınytpaı keltiretin erekshe aspap. Bul – kádimgi qaýaq degen kókónis. Qaýaqtyń eki jaq shetin kesip tastap, ishin tazalaıdy. Betin eshkiniń terisimen qaptaıdy. Ortasyn tesip, qalyńdyǵy bir eli qyldy bekitedi. Qyldy sýlap tartqan kezde aspaptan aıbat shekken jolbarystyń úni shyǵady. Osy dybysty estigen ózge ańdar qamys ishinde jolbarys bar eken dep jaqyndamaıdy eken.
Kórmeniń uıymdastyrylýyna «Shańyraq» oblystyq ortalyǵy men «Jebe» qoǵamdyq birlestigi uıytqy boldy.
PAVLODAR