Atyraýda ótip jatqan Ulttyq quryltaı jıynynda Memleket basshysy Qasym-Jomart Toqaev ulttyq qundylyqtar júıesin qurýdy usynyp, qoǵamda beleń alǵan teris áreketterdi synady, dep jazady Egemen.kz.
«Árbir qazaq ata-babasyn qurmetteıdi, rýhyna taǵzym etedi. Sondyqtan, shejire bizdiń mádenı kodymyzdyń ajyramas bóligine aınalǵan. Biraq biz tek qana osy túsinikpen shektelip qalmaýymyz qajet. Eń bastysy, bul máseleni eshqashan saıasatpen aralastyrýǵa bolmaıdy», dedi Prezıdent.
Qasym-Jomart Toqaev sheteldikter bizdiń eldi «eskertkishter eli» dep ataıtynyn eskerip, ata-babasynyń atyna kóshe berý, eskertkish qoıýdy usynyp ujymdyq hat jazatyndardyń qatary qalyńdap bara jatqanyn tilge tıek etti.
«Sońǵy kezde ata-babasynyń, jerlesiniń esimin ulyqtaýdy surap, ujymdyq hat jazý ádetke aınalyp barady. Atasyna eskertkish qoıýdy, kóshege atyn berýdi ótinetinder kóbeıdi. Bul – jaǵymsyz jaǵdaı. Mundaı ustanymdar elimizdiń birtutas ıdeologııalyq keńistigine zııan keltiredi. Urpaq tárbıesine kesirin tıgizedi. Tipti, shetelde bizdi kóne zamanǵa jáne keńestik kezeńge qatysty monýmentter qaptaǵan «Eskertkishter eli» dep aıtatyn boldy», dedi Q.Toqaev.
Prezıdent onomastıka salasynda Respýblıka, Birlik, Táýelsizdik syndy uǵymdarǵa basa nazar aýdarý kerek ekenin atap ótti.