«Shańyraq» kúninde elordadaǵy Mýzykalyq jas kórermen teatrynda «Baqytty shańyraq ıeleri» atty is-shara uıymdastyryldy. Jas otbasylardyń ónegeli ómiri men shyǵarmashylyǵyn dáripteý maqsatyndaǵy merekelik jıynda balany tusaýyn kesý rásimi ótti. Bul týraly elorda ákimdiginiń resmı saıty habarlady.
Naýryz – týystyq baılanystardy saqtaýǵa jáne qadirleýge úndeıtin otbasylyq mereke. 17 naýryzdyń taqyryby otbasy ınstıtýtynyń mańyzdylyǵymen baılanysty bolǵandyqtan, týystyq qarym-qatynastardy nyǵaıtýǵa sebep bolady. Osy baǵytta Mýzykalyq jas kórermen teatrynda 14 otbasy jemisti eńbek etip jatyr. Shyǵarmashylyq áleminde olardyń ózindik qoltańbalary bar. Sondaı juptardyń biri – teatrdyń beldi akteri Salamat Muqashev pen teatr qyzmetkeri Aıdana Eńgebaı. Búginde eki ul tárbıelep otyrǵan jas juptyń kishi uldary Álı-Ahmet búldirshinniń tusaýy kesildi.
«Teatr tek mádenıet ortasy ǵana emes, shyn máninde teatr shańyraqtyń rólin atqaryp jatyr. Qoıylym barysynda biz kórermenge otbasy qundylyqtaryn nasıhattaı otyryp, januıadaǵy syılastyq, meıirimdilik sekildi izgi sezimderdiń bolýyn jetkizemiz. Teatr ártisteriniń otbasyndaǵy qýanysh, toı, tusaýkeser, shildehana sııaqty rásimderdiń barlyǵy sahnada kórermen aldynda ótkiziledi. Ujymdaǵy jıyrma segiz jannyń úıde de, túzde de birge bolyp, jastarǵa úlgi kórsetýi árıne qýantady», dedi Mýzykalyq jas kórermen teatrynyń dırektory Ashat Maemırov.
Merekelik is-sharaǵa jınalǵan kórermender teatrdaǵy tamasha sáttiń kýágeri bolyp, jas otbasylarmen birge qýandy. Búldirshinniń tusaýy kesilgennen soń, shashý shashylyp, Ashat Maemırov aq batasyn berip, izgi tilegin jetkizdi. Jıyn barysynda taǵdyr toǵystyrǵan juptar ónerlerin ortaǵa saldy.
«Qazaqtyń uıytqysy – shańyraq. О́mir jolynda súrinbeı, eshkimniń ala jibin attamaı, kókteı ósip-ónip, ómiri berekeli bolsyn degen nıetpen balamyzdyń tusaýkeser rásimin kıeli sahnada ótkizdik. Otbasymyz da teatrmen birge jasap keledi. Bizdi toǵystyrǵan – óner. Ekeýmizdiń ónerge degen shynaıy mahabbatymyz bolar, shyǵarmashylyq jolymyzda da bir-birimizge demeý bolamyz», dedi teatr akteri Salamat Muqashev.