Búgin Úkimet otyrysynda «Aýyl – el besigi» baǵdarlamasyn iske asyrý jospary talqylandy. Ulttyq ekonomıka mınıstri N.Baıbazarov baǵdarlama sheńberinde aýyldyq okrýgterdiń tabysyn 2,5 ese arttyrý usynysyn ortaǵa saldy, dep jazady Egemen.kz.
Mınıstrdiń aıtýynsha 2019-2023 jyl aralyǵynda «Aýyl – el besigi» baǵdarlamasyna bıýdjetten 524 mlrd teńge bólinip, 1,8 myń tirek jáne spýtnıktik aýyldarda 5,4 myńnan astam joba iske asyrylǵan.
«Bul turǵyn úı-kommýnaldyq sharýashylyq salasyndaǵy 578 nysandy, 1,7 myń áleýmettik nysandy jáne 3 myńnan astam aýylishilik joldardy salýǵa jáne jóndeýge múmkindik berdi. Sondaı-aq bıyl respýblıkalyq bıýdjetten 179 mlrd teńge bólinip, 500-den astam aýylda 1,4 myń jobany iske asyrý josparlanyp jatyr», dedi N.Baıbazarov.
Sondaı-aq aýyl ekonomıkasyn qarqyndy damytý úshin aýyl bıýdjetiniń kirister bóligin ulǵaıtý kózdelip otyr.
«Osy maqsatta bıýdjettiń IV deńgeıindegi kiristerin 2,5 ese arttyryp, 167 mlrd teńgege jetkizýge múmkindik beretin qosymsha salyqtar men tólemderdiń keıbir túrlerin berý josparlanýda. Atap aıtqanda, jeke jáne zańdy tulǵalardyń múlik salyǵynyń 50%-y, jekelegen qyzmet túrlerimen aınalysý quqyǵy úshin lısenzııalyq alym, paıdalanǵany úshin tólemaqy jáne jer ústi kózderiniń sý resýrstaryn paıdalanǵany úshin tólem», dedi Ulttyq ekonomıka mınıstri.