Prezıdent Ulttyq quryltaıda qadaý-qadaý máselelerdi kóterdi. Onyń ishinde Jaıyq ózeniniń jaǵalaýyndaǵy kóneniń kózi – Saraıshyq qalashyǵyna basa mańyz berip otyr. Biraq Saraıshyqtyń zerttelý jaǵy, qundylyqtaryn dáripteý jaǵy áli jetispeıdi. Onyń sebepterin anyqtaǵan jón.
Jalpy, munaıly ólkede eki nárse qolǵa alynýǵa tıis. Onyń biri – Beıbarystyń ǵylymı ortalyǵy bolýy qajet. Byltyr arab elinde bolǵan kezimizde sondaı ortalyq qurylǵan edi. Arabtyq áriptester ony Qazaqstanmen birlesip qurýǵa yntaly bolyp otyr. Bul iste ǵalymdardy tartý, qarjylandyrý máselesi laıyqty sheshilýi kerek.
Biz daýylpaz aqyn Mahambetti umytyp kettik. Onyń murasyn jańasha zertteý ǵylymı ortalyqtardyń mindeti dep bilemiz. Menińshe, Atyraý óńirindegi joǵary oqý oryndary osyǵan jete kóńil bólýi kerek. Árıne, tek ýnıversıtetter ǵana emes, oblystaǵy mádenıet basqarmasy, basqa da ortalyqtar osy máseleni qolǵa alsa degen usynysym bar.
Jazýshylar ulttyq qundylyqtarymyzdyń keńinen nasıhattalýyna úles qosyp júr. Bıyl jeti atalym boıynsha «Qulager» báıgesi jarııalandy. Ulttyq oıyndardy, salt-dástúrdi ulyqtaý úshin jańa kórkem shyǵarmalar anyqtalady.
Biz elimizdegi kórkem shyǵarmanyń deńgeıin kóteremiz. Alaıda qazaq ádebıetiniń kemshin tusy kóp. Ásirese qazaq prozasy men poezııasy shet tiline durys aýdarylmaı jatyr.
Mereke QULKENOV,
Qazaqstan Jazýshylar odaǵynyń basqarma tóraǵasy