Ramazan - ıgi isterdiń saýaby eselenip, qulshylyq qadamdary quzar shyńǵa jetetin berekeli aı. Bul aıda miskenderdi qýantý, muqtajdyń joǵyn túgendeý, jaqyn-jýyqty dastarqan basynda qosý qaıyrly is. Jamandyqtan tyıyp, jaqsylyqqa jeteleıtin Ramazanda kópshilik aýyzashar berýge asyǵady.
Paıǵambarymyz (oǵan Allanyń salaýaty men sálemi bolsyn): «Kimde-kim bul aıda aýzy berik bir adamǵa aýyzashar berse, kúnálary keshiriledi. Sol aýzy berik adamnyń alǵan saýabyndaı saýap buǵan da beriletinin» aıtqan.
Aýyzashar jurtshylyqty jınap, ǵıbratty áńgime aıtyp baýyrmashyldyqqa bastaıtyn qadirli bas qosý.
Onyń dastarqany az-kem bolyp ólshenbeıdi. «Bir dana qurmamen aýyzashar bergenge de, tek sýmen ǵana orazasyn ashtyrǵanǵa da, kishkene sút bergenge de osy saýap jazylady». (Báıhaqı) Sondyqtan bul aıda asta-tók as berip ysyrapshyldyqqa jol bermeýdiń mańyzy aıryqsha. Bul rette aýyzashar berý ádebin saqtaý quptalady. Myń aıdan da qaıyrly aıdaǵy aýyzashar berý úrdisiniń ádebin «Yryskeldi qajy» atyndaǵy meshittiń bas ımamy Nurlan Baıjigitulynan surap bildik.
«Oraza - qulshylyq. Aýyzashar berý ol da saltymyzben astasyp jatqan jaqsy amaldardyń biri, qulshylyq. Biraq sońǵy ýaqytta Aýyzashar bir-birine elikteýshilik nemese qınaý, zorlyqqa ulasyp ketip jatyr. Mynaý asta-tók dastarqan jaıdy dep qaryzǵa batyp aýyzashar berýdiń qajeti joq. Orazanyń basty maqsaty aǵaıyndardy biriktirý, uzaǵandardy jaqyndastyrý, renjiskenderdi raıynan qaıtarý, aldynan ótý syndy ǵıbratty is-áreketterdi qamtyǵan durys. Bizdiń aýyzasharlarymyz keıingi jyldary shoý, gala - konsertke deıin aınalyp bara jatqan jaǵdaılardy baıqap júrmiz. Bul kezde jylyna bir keletin Ramazan aıyn paıdaly ótkizýge kóńil bólý kerek», dep pikir bildirdi Nurlan Baıjigituly.
Nurlan ımam aýyzashar berýde aldymen nıetti durystaý mańyzdy ekenin qaperge saldy.
«Aýyzashar berýdegi eń eskeretin tus – dastarqanda baqtalastyq bolmaý kerek. Bizdiń qoǵamda adamdar bálensheniń dastarqany keremet boldy, al ekinshi bir adam jaǵdaıy jetkenshe jasasa dastarqany qarapaıym boldy dep áńgimelep jatady. Bul durys áreket emes. Adam Qudaıǵa dastarqanymen jaqyndamaıdy. Peıilimen jaqyndaıdy. Sondyqtan kim qandaı nıetpen aýyzashar berse, saýapta soǵan qaraı beriledi. Asylynda bul asa mán beretin másele. Aýyzasharda birinshi sý, suıyq taǵamdar kóbirek berilý kerek. Bizde birden aldyńa et qoıady. Mundaıda kúni boıy aýzy berik adamnyń shóli basylmaı qalady. Múftııat, basqa da dinı oryndar bekitken dastarqan máziri joq. Halqymyz qurmet bildirý úshin mol dastarqan jaıady. Alaıda baqtalastyqqa ótip ketpeýdi qadaǵalaý shart. Men aldyma jan salmaımyn, meniń dastarqanym eń jaqsy bolýy qajet degen túsinikten arylǵan durys. Paıǵambarymsyz (s.ǵ.s) qurma ber nemese sý ber. Osynyń ózi jetkilikti dep aıtqan», dedi Yryskeldi qajy atyndaǵy meshittiń bas ımamy Nurlan Baıjigituly.