Qap taýynda qos júlde buıyrdy

Jarystyń alǵashqy kúni eki jerlesimiz jeńis tuǵyryna kó­terilip, jankúıerlerin qýant­ty. Ásirese 60 kg salmaq dáre­je­sinde kúresken Nurqanat Serik­baevtyń óneri keremet áser qal­dyrdy. Alǵashqy aınalymdarda kolýmbııalyq Iohan Rohas, ız­raıldik Iehonatan Veksler jáne ýkraı­nalyq Dılshod Halmatovty qapy qaldyrǵan ol jartylaı fınalda ázerbaıjandyq Balabaı Agaevtan aılasyn asyrdy. Nurqanattyń bar­lyq básekedegi basymdyǵy tóre­shiler tarapynan esh kúmán týǵyz­ǵan joq. Fınalda Izraıldiń taǵy bir ókili Iаm Volchakty tize búk­tirgen qandasymyz bas júldeni qanjyǵasyna baılady.

48 kg salmaqtaǵy Ǵalııa Tyń­baeva (48 kg) reseılik Alına Ser­geeva, fransııalyq Melanı Klement jáne brazılııalyq Amanda Lımdan basym túsip, jartylaı fınalda oń­tús­tikoreıalyq Heken Lıge jol berdi. Bul básekeni taǵdyryn «shıdo» sheshti. Úshinshi oryn úshin tartysta Ǵalııa ıspanııalyq Mıreııa Lapýerto Komasty qos jaýyrynymen jerge qadap, qola medaldi moınyna ildi.

Jarystyń sońǵy kúni eki jerle­simizdiń jeńis tuǵyryna kóte­rilýge jaqsy múmkindigi boldy. 100 kg salmaqta Islam Bozbaev hor­vatııa­lyq Zlatko Kýmrıch pen fran­sııa­lyq Frensıs Damıerdi utqa­nymen, shırek fınalda grý­zııalyq Mıhaıl Japarıdzeden jeńildi. Jubanysh beldesýinde ózbek Ernazar Sársenbaevqa san soqtyrǵan saqa sportshy qola júlde úshin tartysta aýstrııalyq Laýrın Bıolerdiń osal tusyn taba almady.

Bastapqy básekelerde fran­sııalyq Djozef Trehek pen ózbek Shohrýhjon Baqtııarovtan basym túsken asa aýyr salmaqtaǵy Erasyl Qajybaevqa odan keıin Grýzııanyń úsh birdeı alybymen aıqasýǵa týra keldi. Alǵashynda ol Iraklıı De­metrashvılıden basym tússe, odan keıin dańqty Gýram Týshıshvılı men Saba Inaneıshvılıge ese jiberip, besinshi orynda qalyp qoıdy.