Ulystyń uly kúni qarsańynda bes qurlyqta tanymal qazaq kúıleri kúmbirledi. Kúıshi Qurmanǵazy, Daırabaı Ernazaruly men Túrkesh Qalqaulynyń kompozısııalaryn 26 eldiń radıo tyńdaýshylary tyńdady.
Tizimde Túrkııa, Iran, Bolgarııa, Ispanııa, Lıtva, Latvııa, Majarstan, Horvatııa, Polsha, Grýzııa, Qyrǵyzstan, Mońǵolııa, Reseı, Brazılııa, AQSh, Qytaı, Úndistan, Indonezııa, Ońtústik Koreıa, Malaızııa, Taıland, Marokko, Efıopııa, Ońtústik Afrıka radıostansalary bar.
Sheteldik radıostansalarda qazaq kúılerin rotasııalaý Mádenıet jáne aqparat mınıstrligi men Syrtqy ister mınıstrliginiń uıymdastyrýymen iske asyp otyr.
Sheteldik radıostansalarda rotasııalaýǵa Qurmanǵazy atyndaǵy Qazaq memlekettik akademııalyq halyq aspaptary orkestriniń oryndaýyndaǵy «Kóńilashar», «Saryarqa», «Balbyraýyn», «Adaı», «Serper», «Daırabaıdyń kúıi» kompozısııalary jiberildi.
«Shyǵystan Batysqa deıingi túrli elde belgili qazaq kúılerin rotasııalaý – Qazaqstannyń baı mádenı murasyn jahanǵa nasıhattaý úshin jasalǵan shaǵyn bolsa da, mańyzdy qadam jáne radıo tyńdaýshylardy dombyra únimen tanystyratyn biregeı múmkindik», dedi Mádenıet jáne aqparat mınıstri Aıda Balaeva.
Sondaı-aq sala basshysy radıostansalardyń qazaq shyǵarmalaryna degen qyzyǵýshylyǵy osy baǵyttaǵy jumysty jalǵastyrý qajettigin aıǵaqtaıtynyn atap ótti. Bul úrdis jyl saıyn qaıtalanatyn dástúrge aınalyp, al sheteldik radıostansalar qory basqa da qazaqtyń mýzykalyq shyǵarmalarymen tolyǵady dep josparlanyp otyr.