Batys Qazaqstan oblysynda kóktemgi sý tasqyny boıynsha kúrdeli jaǵdaı seıilmeı otyr. Naýryzdyń 25-inen beri Oral qalasynda jáne Syrym, Qaratóbe, Terekti jáne Bórli aýdandarynda tótenshe jaǵdaı jarııalandy. О́ńirde qurylǵan jedel shtab táýlik boıy jumys istep, zardap shekkenderge kómek kórsetip jatyr, dep habarlaıdy Egemen.kz.
Qazirgi ýaqytta sý tasqynyna qarsy Tótenshe jaǵdaı departamentinen jáne jergilikti basqarý oryndarynan 953 adam, 265 tehnıka, 146 motosorǵy jumys istep jatyr.
«25 naýryzdan bastap oblys boıynsha 351 myń tekshe metr erigen qar sýy sorylyp, 21440 dana ınertti materıaldarmen qaptar tóseldi», dep habarlady tótenshelikterdiń baspasóz qyzmeti.
Tabıǵattyń tosyn minezi 25 naýryzda bastalyp, táýlik boıy jaýǵan jyly jańbyrdan bastalǵan. Bir táýlikte bir aılyq jaýyn-shashyn mólsheri kókten quıylyp, jerdegi qardy eritip jiberdi. Osylaısha sýǵa sý qosylyp, shaǵyn ózender tasyp, aınaladaǵy aýyldardy jaıpap ketti.
Naýryzdyń 28-i kúngi keshki málimet boıynsha oblysta 455 turǵyn úıdi, kópqabatty 5 turǵyn úıdiń jertólesin jáne 17 áleýmettik nysandy sý basqan.
Tilsiz jaýdan eń kóp zardap shekken óńirdiń biri – Qaratóbe aýdany. Munda qardyń erýi men jaýyn-shashynnyń saldarynan Jaqsybaı ózeni tasyp, Aqqozy aýyldyq okrýgine qarasty Qorjyn aýylyn sý alyp ketti. Eldi mekendegi 130 úı túgelge jýyq sýǵa ketti. Aýyldyń 400-ge jýyq turǵyny áýeli mektep ǵımaratyna evakýasııalansa, keıin Qorǵanys mınıstrligine qarasty eki tikushaqpen Qaratóbe aýdanynyń ortalyǵynda ornalasqan evakýasııa beketine kóshirildi.
Sondaı-aq óńirge Tótenshe jaǵdaılar mınıstrliginiń №28237 áskerı bóliminen 50 adam kelip, Syrym aýdanynyń Jympıty aýylyna qutqarý jumystaryna jiberildi. Ol jerde de 295 adam evakýasııalandy. Aıta keteıik, Syrym aýdanynda О́leńti ózeni minez kórsetýde. Arnasynan asqan ózen sýy jolyndaǵy О́leńti, Jympıty aýyldarynyń keıbir kóshelerin basyp ketti. Buldyrty aýyly da zardap shekti. 26-28 naýryz kúnderi Syrym aýdany boıynsha 1327 adam qaýipsiz jerge kóshirilgen eken. Aýdan ortalyǵyndaǵy turǵyndar «Jibek joly» kempıngi men J.Dosmuhamedov atyndaǵy mektepke ornalasqan. Syrym aýdandyq aýrýhanasynyń dırektory Sabyr Meńdeshevtiń aıtýynsha, 116 adamǵa dárigerlik kómek kórsetilgen.
Shyńǵyrlaý ózeni deńgeıi de kúrt kóterilip, mańaıdaǵy eldi mekenderdi sý basý qaýpi týyndaǵan. Al Bórli aýdanynyń Aqsý kentin sý alyp, 46 úıden 150 adam Aqsý mektebine evakýasııalandy, onyń ishinde 38 adam Oral qalasyna jetkizilmek.
Qazirgi ýaqytta Oral qalasynda, Qaratóbe, Syrym, Bórli jáne Terekti aýdandarynda jergilikti jerdegi tabıǵı sıpattaǵy tótenshe jaǵdaı jarııalandy.
О́ńirde tasqyn sýǵa baılanysty jedel shtab qurylyp, táýlik boıy qyzmet etip jatqanyn habarlaǵan edik. Keshe oblys ákimi Narıman Tóreǵalıev Tótenshe jaǵdaılar departamentiniń mamandarymen birge tikushaqpen atalǵan Qorjyn eldi mekenine baryp, turǵyndardy qutqarý jumystaryna ózi jetekshilik etti.
О́ńir basshysy aýyl halqymen kezdesip, olarǵa memleket tarapynan kómek kórsetiletinin aıtty.
«Barshańyzdy sabyrǵa shaqyramyn. Tabıǵı apat saldarynan oblystyń birneshe aýdany zardap shegip jatyr. Arnaıy komıssııa qurylyp, apattan kelgen barlyq zalal esepteledi. Memleket tarapynan tıisti kómek beriledi. Qazir sizderdi tótenshe jaǵdaılar qyzmetiniń mamandarymen birge sý tasqynynan qutqarýǵa keldik. Tikushaqpen barshańyzdy aýdan ortalyǵy Qaratóbege, qaýipsiz jerge jetkizemiz», dedi oblys ákimi.
Árıne, birinshi kezekte balalar men áıelder, densaýlyǵy nashar jáne múgedektigi bar jandarǵa kómek kórsetilip jatyr.
Aıta keteıik, óńirde qıyn jaǵdaıǵa dýshar bolǵan jerlesterine qoldaý bildirýshi qaıyrymdy azamattar úshin «Aqjaıyq» qory arqyly qarajat jınaý bastaldy.
Rekvızıtter:
BQO, Oral q. J.Moldaǵalıev kóshesi 19, 101 kabınet
Baılanys telefony: 50-64-95,
BSN 030540003364
JSK KZ 1960101811000219258 (teńge)
BSK HSBKKZKX
«Halyq banki» AQ
KBE -18
Batys Qazaqstan oblysy