Ekinshi dúnıejúzilik soǵysynyń ardager barlaýshysy Vasılıı Ivanovıch Zınchenko 29 naýryzda 100 jasqa kelgen mereıtoıyn atap ótti. Ony Desanttyq-shabýyldaý áskerleri qolbasshysynyń orynbasary polkovnık Radjan Janysov, Túrksib aýdanynyń qorǵanys isteri jónindegi basqarmasynyń, soǵys ardagerleriniń, tyl eńbekkerleri men soǵys balalarynyń qoǵamdyq qorynyń ókilderi, desantshy-sarbazdar quttyqtady, dep habarlaıdy Egemen.kz.
Qorǵanys mınıstrliginiń baspasóz qyzmeti málim etkendeı, qurlyq áskerleri áskerı ınstıtýty orkestriniń súıemeldeýimen barlaýshynyń erligine qurmet kórsetken desantshy jaýyngerler mereıtoı ıesiniń aldynan saltanatty marshpen ótti.
«Almatyda Ekinshi dúnıejúzilik soǵysynyń 32 ardageri turady, olardyń segizi bıyl ǵasyrlyq mereıtoıyn atap ótedi. Mindetimiz – qaza tapqan jaýyngerlerdi jadymyzda saqtaý, aramyzda barlaryna qamqorlyq jasaý. Olar maqtanyshymyz, keshegi tarıhty jasaýshylar, batyrlardyń erligi men janqııarlyǵynyń arqasynda biz beıbit aspan astynda táýelsiz, gúldengen memlekette ómir súremiz», dedi quttyqtaý sózinde Desanttyq-shabýyldaý áskerleri qolbasshysynyń orynbasary polkovnık Radjan Janysov.
Vasılıı Ivanovıch 1924 jyly 29 naýryzda Altaı oblysynda dúnıege kelgen. Zınchenkonyń otbasy 1939 jyly Almatyǵa kóship kelgen. Ol 17 jasynda 1941 jyldyń qarashasynda áskerge shaqyryldy.
Barlaý mektebinde alty aılyq oqýdy aıaqtaǵan soń qyzyl ásker sarbazy Stalıngrad maıdanynda shaıqasyp, Ýkraına men Polshany azat etýge qatysty.
Vasılıı Zınchenko «Stalıngradty qorǵaǵany úshin», «Germanııany jeńgeni úshin» medaldarymen, Qyzyl Juldyz ordeni jáne taǵy basqa ordendermen nagradtalǵan.
Vasılıı Ivanovıch – Elba ózenindegi keńestik jáne aǵylshyn-amerıkalyq áskerlerdiń áıgili kezdesýine qatysqan. Sol jerde fashısterdi jeńgeni týraly alǵash habardy estigen.
Soǵys aıaqtalǵan soń, bir jyldan keıin elge oralǵan, júrgizýshi bolyp jumys istep, jastardyń áskerı-patrıottyq tárbıesine qatysqan.
Maıdanger ǵasyrlyq mereıtoıyn óz otbasynda qarsy aldy. Onyń tórt balasy, jeti nemeresi, on eki shóberesi jáne eki nemenesi bar.