Ál-Farabı atyndaǵy Qazaq ulttyq ýnıversıtetinde «Turaqty damý jáne tabıǵatty utymdy paıdalaný» ǵylymı ortalyǵy ashyldy. Jańa ǵylymı ortalyqtyń quramyna Turaqty damý maqsattaryn iske asyratyn 10 ınnovasııalyq zerthana kiredi, dep habarlaıdy Egemen.kz.
Joba Ǵylym jáne joǵary bilim mınıstrliginiń nysanaly qarjylandyrý baǵdarlamasy sheńberinde iske asty.
Ǵylymı ortalyq klımat jáne modeldeý, sıfrlyq kartografııa jáne qoldanbaly geodezııa, GlobalSky (atmosferalyq zertteýlerdiń ınnovasııalyq zerthanasy), turaqty týrızm, sý resýrstarynyń sapasyn taldaý baǵytynda jumys isteıdi. Sonymen qatar landshafttardyń degradasııasyn geoaqparattyq taldaý, geodemografııalyq jáne áleýmettik-ekonomıkalyq zertteýler, ekologııalyq qaýipsizdik, topyraq ekologııasy, qorshaǵan ortany baqylaý sharalaryn iske asyrady.
Qorshaǵan ortanyń jahandyq ózgerýi jaǵdaıynda tabıǵat pen qoǵamnyń ózara is-qımyl zańdylyqtaryn anyqtaý, Qazaqstan óńirlerin turaqty damytý maqsatynda tabıǵı resýrstardy utymdy paıdalaný boıynsha jasyl tehnologııalardy ázirleý jáne engizýdi maqsat etetin ortalyqta geojúıelerdiń, topyraqtyń, releftiń jáne landshafttardyń tabıǵı jáne antropogendik dınamıkasy, tabıǵatty qorǵaýdyń ǵylymı negizderin ázirleý, turaqty damýdyń aımaqtyq erekshelikteri, geoaqparattyq tehnologııalar jáne kartaǵa túsirý sııaqty zertteý baǵyttary júzege asatyn bolady.
Ortalyqtyń ashylý saltanatyna ǵylym jáne joǵary bilim mınıstri Saıasat Nurbek, RF ǵylym jáne joǵary bilim vıse-mınıstri Konstantın Mogılevskıı, ál-Farabı atyndaǵy QazUÝ basqarma tóraǵasy – rektor Janseıit Túımebaev, BUU Jahandyq kommýnıkasııalar departamentiniń ókili Vlastımıl Samek, BUUDB-nyń Qazaqstandaǵy turaqty ókili Iаkýp Berısh, konsorsıýmnyń megagrant boıynsha seriktesteri qatysyp, jańa ortalyqtyń ýnıversıtettik ǵylymdy damytýǵa qosatyn qomaqty úlesin atap ótti.
Jańa ortalyqty geografııa jáne tabıǵatty paıdalaný fakýltetiniń dekany Álııa Aqtymbaeva arnaıy tanystyrdy. Byltyr QazUÝ-dyń geograf-ǵalymdary Ǵylym jáne joǵary bilim mınıstrliginiń Ǵylym komıtetinen 3,8 mlrd teńge kóleminde megagrant utyp alǵan bolatyn. Iske asyp jatqan birlesken baǵdarlama Batys Qazaqstan óńirindegi ekologııalyq máseleler boıynsha strategııalyq mindetterdi sheshýge baǵyttalǵan. Joba úsh jyl merzimge arnalǵan.