Eks-mınıstr Qýandyq Bıshimbaevtyń kezekti sot otyrysynda prokýror áleýmettik jelide sotqa qatysty jarııalanymdardy shekteýdi talap etti, dep habarlaıdy Egemen.kz.
Alqabılerdi sot zalyna shaqyrmas buryn prokýror usynys jarııalady. Memlekettik aıyptaýshy atap ótkendeı, sot taraptardyń básekelesýi úshin barlyq jaǵdaıdy jasaǵan. Atap aıtqanda, sot zalynda fotoǵa túsirýge jáne dybys jáne beıne jazbalardy paıdalanýǵa ruqsat etiledi. Alaıda bul áreketter sot talqylaýynyń qalypty ótýine kedergi bolmaýy kerek.
Prokýrordyń aıtýynsha, 29 naýryzdaǵy sot otyrysynan keıin áleýmettik jelilerde sot otyrysynyń ótýine qatysty jeke pikirlerin bildiretin jazbalar jarııalanǵan. Bul sotqa qysym jasaıdy.
«Bul mán-jaılar sot talqylaýynyń qalypty ótýine kedergi keltiredi jáne alqabılerge keri áserin tıgizedi. Qurmetti sot, proseske barlyq qatysýshylardy qylmystyq is júrgizý zańnamasynyń talaptaryn saqtaýǵa mindetteýińizdi jáne osy másele boıynsha óz pikirlerin bildirýdi suraımyn. Proseske qatysýshylardyń qarsylyqtary, málimdemeleri boıynsha sot talqylaýy áleýmettik jelide emes, sot isin júrgizý aıasynda bolsyn», dedi prokýror.
Sot otyrysyna qatysýshylardyń barlyǵynyń kelisimimen sot tóraıymy ótinishti qanaǵattandyrdy. Ol barlyq qatysýshylarǵa áleýmettik jelide sóz sóıleýden bas tartýǵa keńes berdi, sebebi bul alqabıler arasynda teris pikir týdyryp, qylmystyq isti obektıvti qaraýǵa kedergi keltirýi múmkin.
Eske sala keteıik, Astanada áıeli Saltanat Núkenovany óltirdi dep aıyptalǵan burynǵy Ulttyq ekonomıka mınıstri Qýandyq Bıshimbaevtyń soty ótip jatyr. Sottyń tikeleı kórsetilimin myna silteme arqyly kóre alasyzdar.