Áıelin asa qatygezdikpen óltirdi dep aıyptalǵan eks-mınıstr Qýandyq Bıshimbaevtyń kezekti sot otyrysy ótip jatyr. Sot otyrysyna kýáger shaqyrylyp qosymsha suraqtar qoıyldy. Kýáger Ábil Ǵalymulynyń jaýaptary tergeý kezindegi aıǵaqtarmen sáıkes kelmeıdi, dep habarlaıdy Egemen.kz.
Sot prosesi kezinde prokýror Ábil Ǵalymulyna birneshe suraq qoıdy. Kýáger keı suraqtardan múdirip qaldy. Prokýror onyń tergeý kezinde aıtqan sózderin sot otyrysynda oqyp berdi.
«2023 jyly 8 qarasha kúni men ádettegideı Q.Bıshimbaevtyń úıinde boldym. Páterde menimen birge jumysshylar bolǵan edi. Keshki saǵat 18:00-derge qaraı Qýandyq pen Saltanattyń úıden shyǵyp bara jatqanyn estidim. Biraq men olardy kórmedim. Keıinirek shamamen saǵat 21:00-de Saltanat Núkenovadan úıdiń kilti qaıda turǵanyn surap habarlastym. Sol sátte Saltanat konsertte eken. Ol kilttiń órt qalqanynyń ishinde turǵanyn aıtty. Sosyn biz jumysshylarmen birge úıden shyǵyp kettik», dep prokýror Ábil Ǵalymulynyń tergeý kezindegi sózin oqyp berdi.
Al sot otyrysy kezinde kýáger múldem basqasha jaýap berdi. Atap aıtqanda, ol 8 qarasha kúni Qýandyq pen Saltanatty kórgenin, Núkenovaǵa qońyraý shalmaǵanyn, kilttiń qaıda turǵanyn Baıjanovtan surap-bilgenin aıtty. Prokýror onyń tergeýdegi aıǵaqtaryn keltirgende ol qobaljyp turǵanyn, oqıǵa barysyn esine durys túsire almaı turǵanyn jetkizdi.
Sot otyrysynyń tikeleı kórsetilimin myna silteme arqyly kórýge bolady.