Keshqurym apama habarlasyp, «Aýyl qalaı?» desem, ylǵı: «El aman, jurt tynysh, qazir eshkim eshkimniń úıine kirmeıdi», deıdi muńaıyp. Iá, apamnyń kóńili jabyrqaıtyn jóni bar. Buryn kórshiler anany-mynany surap, úıge jıi keletin. Bolmasa, bir-birine bóten qoı izdep kirip jatýshy edi. Qazir qoıkezek degen de umytylyp barady. Tipti mal ustaıtyn úı azaıdy (óıtkeni qazir mal asyraý tıimsiz desedi). Eń bolmaǵanda ár úıde bir sıyr bolatyn meniń bala kezimde. Bizde de aq sıyr boldy, keıin satyp jiberdik. Úıge kim kelse de shaı qoıylatyn. Apam áńgime aıtyp, qaýqyldasyp qalatyn. Qazir eshkim eshteńe surap kelmeıdi, shaqyrsań ǵana jınalady – apamnyń qulazıtyny sodan. Oılap qarasaq, bul da bir tragedııa.
...deımiz ǵoı. Birneshe kúnnen beri óńirlerdi sý basyp, sumdyq vıdeolardy kórip jatyrmyz. Oshaǵynan aırylǵan halyqqa qarap janyń túrshigedi. Kórshiler bir-birine kirmese de sol aýlymyzdyń aman turǵanyna shúkir dedik. Áıtpese dál qazir qanshama jan úıine habarlasyp, «kelmeı ketken kórshilerin» aıtqysy kelip otyr deseńizshi.