Senattyń Konstıtýsııalyq zańnama, sot júıesi jáne quqyq qorǵaý organdary komıtetiniń depýtattary «Ekonomıkalyq qyzmet salasyndaǵy qylmystyq quqyq buzýshylyqtardy odan ári qylmystyq sıpatynan aryltýdyń ózekti máseleleri» taqyrybyna arnalǵan otyrys ótkizdi, dep habarlaıdy Egemen.kz Senattyń baspasóz qyzmetine silteme jasap.
Komıtet Tóraǵasy Nurlan Beknazarov óz sózinde Memleket basshysy kásipkerlerdiń erkin jumys isteýi úshin jáne elimizge ınvestısııa tartýǵa múmkindik berý úshin ekonomıkalyq teris áreketterdi qylmystan aryltýdy tapsyrǵanyn atap ótti.
«Parlamentshiler men múddeli memlekettik organdar qylmystyq zańnamany izgilendirýdi jalǵastyrý maqsatynda kásipkerlerdiń qorǵalý deńgeıin arttyrý máselesi boıynsha kásipkerlik qyzmettiń erkindigin qorǵaýǵa, tutynýshylar quqyqtarynyń saqtalýyna, sondaı-aq memlekettiń qarjy múddesin qorǵaýǵa baǵyttalǵan ekonomıkalyq qyzmet salasyndaǵy qylmystar úshin jaýapkershilikti belgileýdi kózdeıtin zańnamalyq normalardy qarap jatyr. Bizdiń qoǵamdaǵy ekonomıkalyq qyzmetke baılanysty qylmystardy izgilendirý prosesi kezeń-kezeńimen jáne dáıekti túrde júzege asyp keledi. Depýtattar qarjy-ekonomıka salasyndaǵy qylmystardy qylmystan aryltý maqsatynda qylmystyq zańnamany reformalaý jóninde dáıekti jumys júrgizip jatyr», dedi senator Nurlan Beknazarov.
Otyrysqa tóraǵalyq etken senator Evgenıı Bolgert óz kezeginde kásipkerlerdi qylmystyq jaýapkershilikke tartý normalarynyń shegin belgileý, zań men memleketke áleýmettik senim deńgeıin arttyrýdyń ádil tetigin engizýde retteýdi júıeleý, memleket júrgizip otyrǵan qylmystan aryltý saıasatynyń tetikterin paıdalanýdyń naqty negizderin aıqyndaý qajettigin atap ótti.
Shara barysynda Qarjy monıtorıngi agenttigi tóraǵasynyń orynbasary Jeńis Elemesov, Bas prokýratýranyń, Ádilet mınıstrliginiń, Respýblıkalyq advokattar alqasynyń ókilderi, sondaı-aq KazGZÝ jáne «Astana» halyqaralyq ýnıversıtetteriniń basshylyǵy baıandama jasady.