Pavlodar qalasyndaǵy jańa shaǵyn aýdanda turǵyndardyń ıgiligine 198 páter tapsyryldy. Jańa páterler baspana kezeginde 15 jyldan asa turǵan azamattarǵa buıyrdy. Olar – jetim balalar, kópbalaly, múmkindigi shekteýli balalardy tárbıelep otyrǵan otbasylar.
Oblys ortalyǵynda jańadan paıda bolǵan «Dostyq» shaǵyn aýdanynda taǵy bir turǵyn úı iske qosyldy. Jalpy sany 198 otbasy qonys toıyn toılady.
Pavlodar oblysynyń ákimi Asaıyn Baıhanov páter ıelerine kiltterin saltanatty túrde tabystap turyp:
«Bul páterler sonaý 2000-jyldardan beri turǵyn úı kezeginde turǵandarǵa berilip otyr. Halyqtyń áleýmettik jaǵynan osal toptary, jetim balalar baspanalarmen qamtylyp jatyr. Sabyrlyq tanytyp, osy ýaqyt ishinde túsinistikpen qaraǵandaryńyz úshin alǵys aıtqym keledi. Oblys ortalyǵynda qurylys qarqynynyń aıtarlyqtaı ósýi baıqalady, tek ótken jyly biz kezekte turǵandardyń sanyn 1 myńnan asa adamǵa azaıta aldyq. Bıyl «Dostyq» shaǵyn aýdanynda 1 280 páterli taǵy tórt úı salý josparlanǵan. Shańyraqtaryńyz shattyqqa, baq-bereke men qýanyshqa toly bolsyn!» dedi.
Atalǵan páterler jalǵa berilip otyr. Turǵyndar olardy shekteýsiz merzimge jaldap tura beredi. О́ńirde jalǵa beriletin turǵyn úı salý tájirıbesi jalǵasyn tabatyny da atap ótildi.
Baspana qýanyshyna ıe bolǵan kópbalaly ana Oksana Marsalıkova otbasynyń bul uzaq ýaqyttan beri kútken qýanysh ekenin jetkizdi. Ol memlekettiń qamqorlyǵyn áleýmettik jaǵynan az qamtylǵan shańyraqtar kóbirek sezip otyrǵanyn atap ótti.
«Dostyq» shaǵyn aýdany aldaǵy ýaqytta keńeıe túsedi. Munda qazirgi ýaqytta «Jaıly mektep» ulttyq jobasy aıasynda mektep salynyp jatyr. 2 myń oqýshyǵa laıyqtalatyn bilim uıasy qanatyn keńge jaıyp kele jatqan aýmaqtaǵy kórikti ǵımarattardyń biri bolmaq.
PAVLODAR