Radıoelektronıka jáne baılanys áskerı-ınjenerlik ınstıtýtynda radıotehnıkalyq jáne ınfokommýnıkasııalyq tehnologııalardyń ózekti máselelerine arnalǵan halyqaralyq ǵylymı-praktıkalyq konferensııa ótti.
Is-sharaǵa elimizdiń jáne Qyrǵyzstannyń joǵary áskerı oqý oryndary, Ulttyq qorǵanys ýnıversıteti, «Granıt» arnaıy konstrýktorlyq-tehnologııalyq bıýrosy» JShS, IIM Almaty akademııasy, Ál-Farabı atyndaǵy Qazaq ulttyq ýnıversıteti, Halyqaralyq aqparattyq tehnologııalar ýnıversıtetiniń ókilderi qatysty.
Dıalogke jetekshi ǵalymdar, adıýnktter, magıstranttar, doktoranttar, áskerı jáne qos maqsattaǵy perspektıvaly ınfokommýnıkasııalyq tehnologııalardy ázirleýmen jáne meńgerýmen aınalysatyn kásiporyndar men mekemelerdiń ınjener-tehnık mamandary, sondaı-aq radıotehnıkalyq mamandyqtardyń stýdentteri men kýrsanttary qosyldy.
– Baılanys, basqarý jáne radıotehnıkany avtomattandyrý salasynda áskerı kadrlardy daıarlaý bilim berý sapasyn arttyrýdy ǵana emes, odan ózge joǵary oqý oryndary arasyndaǵy tyǵyz baılanysty uıymdastyrýdy, bilim berý jáne aqparattyq bilim berý tehnologııalaryn jetildirýdi de qamtıdy, – dedi Radıoelektronıka jáne baılanys áskerı-ınjenerlik ınstıtýtynyń basshysy, polkovnık Qaırat Dáýitov.
Konferensııaǵa qatysýshylardyń basty nazary qorǵanys salasynda sıfrlyq tehnologııalardy qoldaný máselelerin talqylaýǵa baǵyttaldy. Atap aıtqanda, ushqyshsyz basqarylatyn qurylǵylardy anyqtaý úshin radıolokasııalyq stansalardy zertteý jáne ázirleý tóńireginde boldy. Radıolokasııalyq stansa júıelerinde jasandy ıntellektti qoldaný da talqylandy.
Qarýly kúshterdi sapaly radıobaılanyspen qamtamasyz etý máselelerine nazar aýdaryldy. Zamanaýı tehnologııalar áskerı qyzmettiń osy mańyzdy elementin barynsha turaqty etýge jáne qorǵanysh qabiletin arttyrýǵa múmkindik beredi.
Konferensııa áskerı radıotehnıka jáne baılanys salasyndaǵy jetekshi mamandar arasynda tájirıbe jáne ıdeıa almasý alańyna aınaldy. Jıyn qorytyndysynda baılanys júıelerin odan ári damytý jáne áskerı kadrlardy daıarlaýdy jetildirý jóninde usynystar qabyldandy.