Sátbaev qalasyndaǵy uly ǵalymnyń músini ornatylǵan alleıany abattandyrýdy «Aq jol» partııasynyń Ulytaý oblystyq fılıaly óz qolyna aldy. 2018 jyly ornatylǵan músinniń aınalasy tozyńqyrap ketken edi.
Partııanyń Sátbaev qalasyndaǵy úılestirýshisi Ahan Jaılaýbaev bastaǵan aqjoldyqtar akademıktiń alleıasyndaǵy oryndyqtardy syrlap, jerdi qopsytyp, gúl egýge ázirlep qoıdy. Ǵalymnyń tastuǵyrdaǵy beınesi jýylyp, tazalandy. Músindegi kómeskilene bastaǵan «Qanysh Imantaıuly Sátbaev 1899-1964 j.j.» degen jazýyn da jańartyp ildi. Zeınetker Zııadın Súleımenov óz qarjysyna jas kóshetter satyp ákelip, otyrǵyzdy.
«Jezqazǵannyń jer baılyǵyn taýyp, sony el ıgiligine aınaldyrǵan Qanysh atamyzǵa qandaı qurmet kórsetsek te artyǵy bolmaıdy. Taıaý kúnderi ǵalymnyń 125 jyldyq mereıtoıy atap ótiledi. Sol mereıtoı qarsańynda «aqjoldyqtar» alleıany abattandyrý jumystaryn bastady. Endi alleıanyń aınalasyna qorshaý júrgizemiz. Jaz boıy sýarý, kútim jasaýdy da óz moınymyzǵa alamyz. Osy iste belsendilik tanytqan О́mirhan Qudaspaev, Erjan Elebaev, Erik Jańbyrshınov, Marhat Hamıtov, Mahan Rahymberdıev, Dosjan Qapanov tárizdi azamattardyń esimderin aıryqsha atap ótkim keledi», deıdi partııa múshesi Ulytaý oblystyq máslıhatynyń depýtaty Bekzat Daırabaıuly.
Aqjoldyqtar 12 sáýirde músin aldynda merekelik is-shara uıymdastyryp, gúl shoqtaryn qoıýdy da oılastyryp otyr.
Ulytaý oblysy,
Sátbaev qalasy