Astanada Shanhaı yntymaqtastyq uıymyna (ShYU) múshe memleketterdiń qaýipsizdik keńesteri hatshylarynyń kezdesýi ótti. Qazaqstan Prezıdenti Q.Toqaev ShYU-nyń zamanaýı syn-qaterler men qaýipterge qarsy qoldanatyn ádis-tásilderin kúsheıtýi qajet ekenin atap ótti.
«ShYU – jańaryp kele jatqan halyqaralyq qaýipsizdik arhıtektýrasy negizderiniń biri. Sondyqtan bizdiń Uıym óńirdegi turaqtylyq pen qaýipsizdikti qamtamasyz etýdi kózdeıtin ózara kelisilgen əri naqty qadamdardyń úlgisin kórsetýge tıis. Memleketterimizdiń shyrqyn buzatyn terrorızm, ekstremızm jáne separatızm áreketteriniń beleń alýyna jol berýge bolmaıdy», dedi Q.Toqaev.
Q.Toqaevtyń paıymdaýynsha, Terrorızmge, separatızmge jəne ekstremızmge qarsy is-qımyl jónindegi 2025-2027 jyldarǵa arnalǵan yntymaqtastyq baǵdarlamasyn qabyldaý kerek. Sonymen qatar Prezıdent ShYU-nyń Esirtkige qarsy 2024-2029 jyldarǵa arnalǵan strategııasyn jəne ony júzege asyrý jónindegi is-qımyl baǵdarlamasyn qabyldaý mańyzdy ekenine toqtaldy.
Qaýipsizdiktiń pármendi quraly
Qazaqstan Prezıdenti Qasym-Jomart Toqaev ShYU-ǵa múshe elder – Qytaı, Reseı, Úndistan, Qyrǵyzstan, Tájikstan, Pákistan, Iran, О́zbekstan, Qazaqstan qaýipsizdik keńesteriniń hatshylarymen kezdesti.
Q.Toqaev Qazaqstannyń usynysy boıynsha ShYU qyzmetin jetildirý úderisi bastalǵanyn aıta kele, aımaqtyq jáne halyqaralyq qaýipsizdiktiń pármendi quraly retinde uıymnyń áleýetin iske asyrý qajettigin atap ótti.
«Bul maqsatqa jetý úshin qaýipsizdik keńesteri hatshylarynyń kezdesýleri mańyzdy ról atqarady. Sizder ulttyq qaýipsizdiktiń ərtúrli baǵytyna jetekshilik etesizder. Qazir syn-qaterler men qaýipterge qarsy kúresý úshin birtutas əri birikken jumys təsili óte mańyzdy», dedi Prezıdent.
Transulttyq uıymdasqan qylmysqa, zańsyz esirtki aınalymyna, kıberqaýipsizdik syn-qaterlerine qarsy kúres Qazaqstannyń ShYU-ǵa tóraǵalyq etý kezeńindegi eń basty basymdyqtardyń biri sanalady.
Halyqaralyq yntymaqtastyq úlgisi
Turaqty damý bastamalaryn ilgeriletý úshin Qazaqstannyń turǵyn úı-kommýnaldyq sharýashylyǵy ortalyǵy jaqynda Ecolos kómegimen Malaızııanyń «Ranhill» halyqaralyq kompanııasymen kelissózder júrgize bastady.
Taraptar aǵyn sýdy tazartý qondyrǵylary jobalaryna jáne ınfraqurylymdy kómirteksizdendirýge baǵyttalǵan bastamalarǵa erekshe nazar aýdara otyryp, yntymaqtastyqtyń strategııalyq baǵyttaryn talqylady. Turǵyn úı-kommýnaldyq sharýashylyq QazOrtalyǵy halyqaralyq jáne jeke ınvestısııalardy tartý arqyly aǵyn sýdy tazartý jobalarynda «Ranhill» jáne «Ecolos» kompanııalaryna qoldaý kórsetýge daıyn.
Bul jobanyń búkil Qazaqstan boıynsha engizý perspektıvasymen dekarbonızasııa salasyndaǵy halyqaralyq yntymaqtastyqtyń úlgisi bolý áleýeti bar. Taraptar turǵyn úı-kommýnaldyq sharýashylyq QazOrtalyǵy tehnıkalyq spesıfıkasııany ázirleıdi, al «Ranhill» kompanııasy «Ecolos» kompanııasymen birlesip, aldyn ala jobany usynady dep kelisti. Jobany bıýdjet qarajatyna súıenbeı, halyqaralyq jáne jeke ınvestısııalardy tartý arqyly júzege asyrý josparlanǵan.