Sý basqan eldi mekenderden evakýasııalanǵan turǵyndardyń birazy Qostanaıdaǵy «Agromash» zaýytynyń jataqhanasyn pana etip júr. Kompanııa ókilderiniń aıtýynsha, jataqhanada áli eki bólme bos tur.
Sý tasqynyna qarsy tolassyz atqarylyp jatqan is-sharalarǵa kóppen birge jergilikti mashına jasaý kásiporyndary da atsalysyp jatyr. Turǵyndardy evakýasııalaý, ózge de tolyp jatqan sharýalardyń ishinde 250-ge jýyq mashına jasaýshy maman júr.
Munyń syrtynda, tehnıka kúshin qajet etetin jerlerde «Allur» zaýytynyń 11 avtobýsy, 15 júk kóligi, 3 arnaıy tehnıkasy jumys istep jatyr. Kásiporyndar jumys basyndaǵylardy qajetti dúnıelermen, aýyz sý, ystyq tamaqpen qamtamasyz etip jatyr.
«Mundaı qıyn kezeńde jumylyp judyryq bolyp, aýyrtpalyqty kóppen birge kótere bilý mańyzdy. Osyndaı qıyn-qystaý sátte ózge de bıznes ókilderin kóptiń kóleńkesinde qalmaı, sý tasqynynan zardap shegip jatqan turǵyndarǵa kómek qolyn sozýǵa shaqyramyz», deıdi mashına jasaý kásiporyndarynyń ókilderi.
Qostanaı oblysy