Jylyoı aýdanynda sý tasqyny qaýpi seıildi, dese de sýdyń beti áli qaıtpaı jatyr, dep habarlaıdy Egemen.kz.
Aýdan turǵyndary osymen altynshy kún qatarynan qarǵyn sýmen kúresip jatyr. Osy tusta QR Parlamenti Májilisiniń depýtaty Ádil Jubanov jergilikti turǵyndardyń jaǵdaıyna alańdaýshylyq bildirip, jelide jazba qaldyrdy.
«Sý tasqynynyń qaýpi seıilgenimen, sýdyń beti qaıtpaı halyqty ábigerge salyp jatyr. Jylyoı aýdanynda tasqyn sýdan qaza bolǵan 2 adamnyń denesi tabyldy. Taǵy ákeli-balaly 2 adam izdestirilip jatyr. Baspanasyna sý kirip, sharasyz kúıde júrgen qulsarylyqtar úshin bul óte aýyr jaǵdaı», dep jazdy depýtat.
Ádil Jubanov sý tasqyny saldarynan qaza tapqan azamattardyń jaqyndaryna kóńil aıtty.
«Tasqyn sýdyń saldarynan qaza tapqandardyń ımany salamat bolsyn! Otbasylary men týystaryna qaıǵyra kóńil aıtamyn. Qıyn sátte el bolyp qoldaý tanytyp, sý tasqynynyń qaýpi seıilsin, tezirek baspanalaryna oralsyn dep tileımiz! Biz Májilis qabyrǵasynda zardap shekken ár otbasyǵa barlyq qajetti kómektiń kórsetilýin, keltirilgen árbir shyǵynnyń ótelýin talap etip, baqylaýda ustaımyz. Qulsarylyqtarǵa Alla amandyǵyn bersin!», delingen jazbada.