Batystaǵy aǵaıynnyń jaǵdaıyna alańdaǵan Jetisý jurty aı basynan beri gýmanıtarlyq kómek jınaýdy bastaǵan edi. Az ýaqyt ishinde jınalǵan kómek kúni keshe jiberildi.
Osyndaı kúrdeli kezeńde úı-kúısiz qalǵan halyqqa kómektespeý – eldigimizge syn. Sondyqtan oblys turǵyndary zardap shekken óńirlerdiń halqyna jan-jaqty kómek kórsetýge kiristi. Keshe Jetisýdan Batys Qazaqstan oblysyna áleýmettik-gýmanıtarlyq kómek jiberildi. Úsh júk kóligine tıelgen 85 tonna un, makaron, qant jáne kúndelikti qajetti zattar, tósek-oryn alystaǵy aǵaıynǵa joldandy.
Oblystyń memlekettik qyzmetkerleri bir kúndik jalaqylaryn aýdarsa, kásipkerler de atymtaı jomarttyq tanytyp jatyr. Oblystyq qoǵamdyq damý basqarmasynyń basshysy Baýyrjan Abıbekov: «Batys Qazaqstan oblysyna kásipkerler 150 mln teńgege jýyq qarjylaı kómek jiberdi. Kerbulaq sement zaýyty myń tonna sement jiberetinin aıtty. «Meıirimdi Jetisý» volonterlik front ofısi men Amanat partııasynyń Jetisý oblystyq fılıaly 10 aýdanda kómek-pýnkttiń ashylýyna uıytqy bolyp, azyq-túlik, kıim-keshek jóneltti. Jalpy, Jetisý jurtshylyǵy tasqynnan zardap shekken oblystarǵa 200 mln teńgege jýyq qarjy aýdardy», dedi.
Elimizde bolyp jatqan sý tasqynynan zardap shekken oblystarǵa respýblıka boıynsha turǵyndar men kásipkerler jan-jaqty qoldaý kórsetip, qolushyn sozyp jatyr. Osyǵan oraı Panfılov aýdanynyń turǵyndary men kásipkerleri birlese jınaǵan 25 tonnaǵa jýyq áleýmettik mańyzy bar azyq-túlik pen turmystyq zattar, dári-dármek, elektr qýatyn beretin generator syndy asa qajetti qural jabdyqtardy jóneltti.
«Osy bastamamyzdy qoldap, gýmanıtarlyq kómekke atsalysqan kásipkerler men turǵyndarǵa zor alǵysymdy bildiremin. Jazıraly Jarkent óńiriniń turǵyndary men kásipkerleri elimizdegi barlyq jaǵdaıǵa beı-jaı qaramaıtynyn kórsetip, bereke-yntymaǵynyń arqasynda qoldaý kórsetti», deıdi aýdan basshysy Marat Saǵymbek.
Bul qatardan kóksýlyq aqjúrek azamattar da tabyldy. Olar jalpy kólemi 5 162 600 teńgeni quraıtyn 5 tonna qant, 5 tonna kartop, 6 tonna azyq-túlik sebetterin jınaǵan. Sonymen qatar 560 myń teńge qarjylaı kómek te bergen.
Jetisý oblysy