Qazirgi tańda elimiz sońǵy 80 jyldaǵy eń úlken sý tasqynyna tap bolyp otyr. Sonyń saldarynan alpystan asa eldi meken syrtqy qatynaspen baılanysyn úzgen. Ásirese, batys, shyǵys jáne soltústik óńirlerindegi jaǵdaı qıyndap barady. Tótenshe jaǵdaılar mınıstrliginiń málimetine qaraǵanda, sońǵy eki kúnde sý basqan aýmaqtardan 80 myńǵa jýyq adam evakýasııalanyp, 4000 myńnan astam turǵyn úı men 500-ge tarta aýla aýmaǵy sý astynda qalǵan.
Tilsiz jaýdyń saldarynan shapa shekken halyqqa alǵashqylardyń biri retinde «Qazaqstan halqyna» qory 10 mlrd teńge shamasynda qarajat bóldi. Osyǵan deıin de 200 baspana salý úshin 5 mlrd teńge aýdarǵan. Ártúrli kompanııalardan 970 mln teńge jınalypty.
Qazaqstan musylmandary dinı basqarmasynan sý tasqynynan zardap shekken óńirlerge 100 tonnadan astam gýmanıtarlyq kómek, 300 otbasyǵa arnaıy áleýmettik mańyzy bar azyq-túlik sebetteri jiberildi. Tasqynnan zardap shekken óńirlerge qajetti zattardy satyp alý úshin oblystardan qosymsha 23 mln teńge qarjylaı kómek kórsetilip jatyr.
«Samuryq-Qazyna» AQ qarasty korporatıvtik ortalyq, «QazMunaıGaz», «Qazatomónerkásip», «Qazaqstan temir joly», «Kegok», «QazaqGaz», «Qazaqtelekom», «Eır Astana» jáne «Samuryq-Energo» kompanııalary birlese 15 mlrd teńge shamasynda materıaldyq kómek kórsetken.
Búginderi «QazaqGaz» AQ mamandary tótenshe jaǵdaı kezinde halyqty tabıǵı gazben úzdiksiz ári qaýipsiz qamtamasyz etip otyr. Atalǵan kompanııa «Samuryq-qazyna» qorynyń portfeldik kompanııasy retinde sýdan zardap shekkenderge 1 mlrd teńge qarajat bólgen. Qazir óńirlerde apattyq-qutqarý jáne sý tasqynyna qarsy jumystarǵa myńǵa tarta qyzmetker men 200-den asa tehnıka jumyldyrylyp otyr. Qashaǵandaǵy gaz óndeý zaýyttarynyń qurylysyna tartylǵan 100 tehnıka tasqyn sýmen kúres jumysyna da jumyldyrylǵan. Sý basqan aımaqtarda eriktiler jasaqtary qurylyp, kompanııanyń keıbir jumysshylary óz erikterimen azyq-túlik satyp alýǵa bastama kóterip, ystyq tamaq taratyp jatyr.
Taıaýda Saýda jáne ıntegrasııa mınıstrligi respýblıkalyq mańyzy bar 20-dan astam saýda jelisi qatysýymen kezdesý ótkizdi. Onda Atyraý, Aqmola, Batys Qazaqstan jáne Soltústik Qazaqstan oblystaryndaǵy kúrdeli jaǵdaıǵa baılanysty SIM basshysy iri rıteıl-kompanııalaryn azyq-túlik qorynyń qoljetimdiligine kúndelikti monıtorıng júrgizýge shaqyrdy.
«Tórt aımaqqa kóbirek kóńil bólý qajet. Osy óńirlerde birinshi kezekte eń qajetti negizgi taýarlardy jetkizýdiń turaqtylyǵyn qamtamasyz etip, baǵanyń negizsiz ósýine jol bermeýimiz kerek. Qoıma qorlaryn jedel aýystyrý úshin jergilikti atqarýshy organdarmen jáne bizdiń aýmaqtyq bólimshelermen is-qımyl algorıtmi bar. Azyq-túlikpen qamtamasyz etý týraly bizge tez arada habarlaýyńyzdy suraımyz», dedi Arman Shaqqalıev.
Ol sondaı-aq Úkimet sý tasqynynan zardap shekken saýda nysandaryna keltirilgen zııandy óteý mehanızmi pysyqtalyp jatqandyǵyn atap ótti.