Almatyda seısmıkalyq qaýipsizdik jáne jumyldyrý daıyndyǵy basqarmasy basshysy qyzmetin Batyrhan Súleımenov ýaqytsha atqarady, Al Nurlan Nurǵabylov qoǵamdyq keńistikterdi damytý basqarmasyn ýaqytsha basqarady, dep habarlaıdy Egemen.kz.
Batyrhan Súleımenov 1992 jyly Atyraý oblysynda dúnıege kelgen.
2015 jyly Ulybrıtanııanyń Kardıff Metropolıtan ýnıversıtetin «Menedjment» mamandyǵy boıynsha támamdaǵan.
Eńbek jolyn 2014 jyly bastaǵan. Ár jyldary kommersııalyq jáne memlekettik uıymdarda basshylyq laýazymdarda jumys istedi. 2017 jyly qurylys kompanııasynda Bas dırektor bolyp jumys istedi. 2020 jyldan bastap atalǵan taǵaıyndaýǵa deıin Almaty qalalyq josparlaý jáne ýrbanıstıka basqarmasy basshysynyń orynbasary boldy.
Nurlan Nurǵabylov 1988 jyly týǵan.
Ál-Farabı atyndaǵy Qazaq ulttyq ýnıversıtetin «Halyqaralyq quqyq» mamandyǵy boıynsha, sondaı-aq «Bolashaq» baǵdarlamasy boıynsha men University of Dundee (Ulybrıtanııa) bitirip, quqyq magıstri biliktiligin aldy.
Eńbek jolyn 2008 jyly «Macleod Dixon LLP» kompanııasynyń Almaty fılıalynda bastaǵan. Astanadaǵy Úkimet janyndaǵy ulttyq taldaý ortalyǵy ekonomıkalyq strategııalar departamentinde sarapshy-taldaýshy bolyp jumys istegen. 2012-2013 jyldary – Ádilet mınıstrligi memlekettiń múliktik quqyqtaryn qorǵaý departamentiniń bas sarapshysy. 2023 jylǵy maýsymnan bastap qazirgi taǵaıyndaýǵa deıin Almaty qalasy jer qatynastary basqarmasynyń basshysy boldy.
Qala ákimdigi taratqan habarlamada: «Eske salsaq, Almaty máslıhatynyń kezekten tys XIV sessııasynda jańa seısmıkalyq qaýipsizdik jáne jumyldyrý daıyndyǵy basqarmalary bekitildi. Jańa qurylymdar aýdandyq ákimdikterdiń basqa basqarmalaryn, apparattaryn ońtaılandyrý esebinen qalyptasady jáne shtatty ulǵaıtýdy kózdemeıdi», delingen.