Sý resýrstary jáne ırrıgasııa mınıstrligi Qazaqstandaǵy sý arnalary men ózen-kólderdegi qazirgi syıymdylyq kórsetkishin jarııalady, dep jazady Egemen.kz.
Qostanaı oblysynda Tobyl ózeniniń iri sý qoımalary tasqyn sýyn qaýipsiz ótkizýdi qamtamasyz ete otyryp, 92% sý jınady. Tobyl ózeninde sýdyń mol kelýi sońǵy ret 2000 jyly tirkelgenin atap ótkim keledi, biraq ol kezde de mundaı qarqyndy aǵynnyń qalyptasýy bolǵan joq. Sý aǵyndarynyń arqasynda qazir eki sý qoımasy da uzaq ýaqyt boıy aımaq turǵyndaryn qajetti mólsherde sýmen qamtamasyz ete alady.
Astana sý qoımasyn tasqyn sýymen toltyrý 2 mlrd teńgege deıin únemdeýge múmkindik beredi.
Aqmola oblysynda Astana sý qoımasyn toltyrý kórsetkishi - 99,6%. Bul jyl boıy elorda turǵyndaryn aýyzsýmen qamtamasyz etýge, sondaı-aq Esil ózeniniń gıdrologııalyq jaı-kúıin jaqsartý múmkindik beredi.
Byltyr Astana sý qoımasyndaǵy sý kólemi qalany aýyz sýmen tolyq qamtamasyz etýge jetpedi, sondyqtan sý qoımasyn Q.Sátbaev atyndaǵy kanaldan qosymsha toltyrýǵa týra keldi. Bul qajettilikti óteý qymbatqa shyǵyp, quny 2 mlrd teńgeden asqan edi.
Batys Qazaqstan oblysynda Jaıyq ózeni arqyly 1 tekshe shaqyrym sý jınaý josparlanyp otyr.
Batys Qazaqstan oblysynda Jaıyq ózeninen shamamen 1 tekshe shaqyrym sý alýǵa múmkindigi bar Jaıyq-Kóshim sýarý júıesine sý jiberý múmkindigi paıda boldy.
Ertis ózeniniń sý qoımalarynan jiberilgen sý Pavlodar oblysynyń aýyl sharýashylyq qajettiligin óteýge jáne Qostanaı oblysyndaǵy kólderdi toltyrýǵa múmkindik berdi.
Shyǵys Qazaqstan oblysynda 10 sáýirden bastap Ertis ózeniniń sý qoımalary kaskadynan sý jiberý júzege asyrylady. Bul Shiderti-О́leńti aımaǵyn tıimdi sýlandyrýǵa jáne Áýlıekól kólderin tolyqtyrýǵa múmkindik berdi.
Qaraǵandy oblysynda jınalǵan tasqyn sýy bir jyl boıy óńir ekonomıkasynyń qajettilikterine jetedi.
Qaraǵandy oblysynyń sý qoımalarynda sý tasqynynyń belsendi kezeńi ótti, qazir sý qoımalary 100% toldy. Aǵyndardyń ósýi kútilmeıdi. Jınalǵan sý jyl boıyna aımaq ekonomıkasynyń qajettilikterin tolyǵymen óteýge múmkindik beredi.
Ulytaý obdysyndaǵy sý qoımasynan jiberilgen sý alǵash ret Qyzylorda oblysynyń kólderin toltyrdy.
Ulytaý oblysynda Keńgir sý qoımasyn paıdalaný tarıhynda alǵash ret 270 mln tekshe metr kóleminde eń kóp sý jiberý jaǵdaıy tirkeldi. Osyǵan baılanysty Keńgir sý qoımasynan jiberilgen sý Sarysý ózeni arqyly Qyzylorda oblysynyń kólderine tústi.
Qyzylorda oblysynyń Telikól kólder júıesiniń qarqyndy sý jınaýy baıqalady, bul óńirdiń aýyl sharýashylyǵyna jaǵymdy áser etýi tıis.
Ile ózeni arqyly Balqash kóline 2,3 tekshe shaqyrym sý tústi.
Ile transshekaralyq ózeniniń aǵyny Almaty oblysynyń Qapshaǵaı sý qoımasynan Balqash kóline shamamen 2,3 tekshe shaqyrym kóleminde ekologııalyq maqsatta sý jiberýge múmkindik berdi.
Jalpy, tasqyn sýy barlyq sý qoımalaryn toltyrýǵa, tipti qurǵaq aımaqtarda da sý jınaýǵa múmkindik berdi. Bul aýyl sharýashylyǵy, ónerkásip jáne aýyzsý úshin mańyzdy. Sondaı-aq Atyraý oblysyna kelgen tasqyn sýy Kaspıı teńizine jiberiletinin, ol úshin qazir qosymsha kanal qazylyp jatqanyn qosa ketý kerek. Iаǵnı Sý resýrstary jáne ırrıgasııa mınıstrligi qazir sý qoımalarynda jınalǵan tasqyn sýyn utymdy paıdalaný boıynsha belsendi jumys júrgizip jatyr.