Shyǵys Qazaqstan oblysynyń orta taýly aımaqtarynyń ońtústik betkeılerinde qardyń erýine baılanysty sý tasqynynyń ekinshi tolqyny bastaldy. Bul týraly Ortalyq kommýnıkasııalar qyzmetinde ótken brıfıngte oblystyq Tótenshe jaǵdaılar departamenti tótenshe jaǵdaılardyń aldyn alý bóliminiń aǵa ınjeneri Aıaýlym Kekıeva málimededi, dep habarlaıdy Egemen.kz.
«Qazirgi ýaqytta oblystyń soltústik, soltústik-shyǵys jáne shyǵys aımaqtarynda (Rıdder, Altaı, Samar, Marqakól, Glýbokovskıı, Katonqaraǵaı, Kúrshim, Shemonaıha aýdandary) sý tasqyny qaýpi bar. Oblys boıynsha qar jatqan aýmaq 44 paıyzdy quraıdy. Kóptegen aýdanda qar qory men ondaǵy sý mólsheri normadan 1,5-2 ese asyp ketken», dedi Á.Kekıeva.
Onyń aıtýynsha, barlyq gıdrotehnıkalyq qurylystar qalypty rejımde jumys istep jatyr. Sý tasqyny jaǵdaıyn ýaqtyly baǵalaý úshin turaqty negizde aerovızýaldy barlaýlar júrgiziledi. Spıker mobıldi toptar táýlik boıy monıtorıng júrgizip otyrǵanyn da aıta ketti. Oblystaǵy ahýal baqylaýǵa alyndy.
«Profılaktıkalyq is-sharalar jospary sheńberinde jaǵalaýdy qorǵaý jáne tereńdetý, bógetterdi salý, qaptardy tóseý jumystary júrgizilip jatyr. Jergilikti atqarýshy organdar arnalardy, aryqtardy, kópirlerdi tazartý boıynsha josparlanǵan jumystardy tolyǵymen oryndady. Barlyq qyzmetterdiń jumysyn úılestiretin aımaqtyq jedel shtab jumys istep tur. Qaýipti aımaqtarda sýdy sorý jáne qum toltyrylǵan qaptardy tóseý boıynsha shuǵyl sharalar qabyldandy», dedi aǵa ınjener.
Qyrmyzy JUMAǴALIQYZY,
EUÝ stýdenti