Senat Spıkeri Máýlen Áshimbaevtyń tóraǵalyǵymen ótken Palata otyrysynda «QR-nyń keıbir zańnamalyq aktilerine ǵylym jáne bilim berý máseleleri boıynsha ózgerister men tolyqtyrýlar engizý týraly» Zań qaralyp, maquldandy. Jańa normalar ǵalymdardyń áleýmettik kepildikterin jaqsartýǵa jáne ǵylymda qarjy resýrstaryn paıdalanýdy ońtaılandyrýǵa baǵyttalǵan, dep habarlaıdy Egemen.kz joǵarǵy Palatanyń baspasóz qyzmetine silteme jasap.
Palata Tóraǵasy zań Memleket basshysynyń tapsyrmalaryna oraı, Ǵylym jáne tehnologııalar jónindegi ulttyq keńestiń otyrysynda belgilengen mindetterdi iske asyrý úshin ázirlengenin, sondaı-aq oǵan Parlament depýtattary bastamashy bolǵanyn atap ótti.
«Atalǵan zań ǵylymı-pedagogıkalyq jáne ǵylymı-zertteý jumystarymen aınalysatyn muǵalimderdiń negizgi jalaqysyna qosymsha aqy belgileýdi kózdeıdi. Sondaı-aq jetekshi ǵalymdarǵa ǵylymı jumystardy aıaqtaý úshin aqyly shyǵarmashylyq demalys alý quqyǵy qarastyryldy. Merzimdi áskerı qyzmetti ótkergen azamattarǵa da joǵary oqý oryndaryna túsý kezinde jeńildikter beriledi. Maquldanǵan zań otandyq ǵylymdy jáne elimizdiń bilim berý júıesin odan ári damytýǵa oń septigin tıgizedi dep senemiz», dedi Máýlen Áshimbaev.
Sonymen qatar Palata otyrysynda senatorlar «QR-nyń Úkimeti men Túrkııa Respýblıkasynyń Úkimeti arasyndaǵy halyqaralyq quramdastyrylǵan júk tasymaldary týraly kelisimdi ratıfıkasııalaý týraly» zańdy qarap, maquldady. Kelisim kóliktiń ártúrli túrlerin paıdalana otyryp, halyqaralyq júk tasymaldaryn jeńildetýge, sondaı-aq Qazaqstan – Túrkııa arasyndaǵy tranzıttik-kóliktik áleýetti jáne saýda-ekonomıkalyq qatynastardy damytýǵa arnalǵan.
Sondaı-aq Senat depýtattary «QR-nyń keıbir zańnamalyq aktilerine halyqtyń kóshi-qony jáne qylmystyq-atqarý júıesi salalaryndaǵy zańnamany jetildirý máseleleri boıynsha ózgerister men tolyqtyrýlar engizý týraly» zańdy ekinshi oqylymda qarady. Depýtattar bastamashy bolǵan qujat atalǵan sala boıynsha zańnamany jetildirýdi kózdeıdi. Naqty aıtqanda, kámeletke tolmaǵandardyń jynystyq qol suǵylmaýshylyǵyna qarsy qylmystary úshin sottalǵan sheteldikterdiń elimizge kirýine jáne Qazaqstan azamattyǵyn alýyna shekteý engizý qarastyrylǵan. Odan bólek, ekstremıstik nemese terrorıstik áreketterge qatysy bar sheteldikterdiń elge kirýine tyıym salynady.
Talqylaý kezinde senatorlar zańdy konseptýaldy turǵyda qoldap, oǵan birqatar túzetý engizýdi usyndy. Osyǵan baılanysty Senat depýtattary usynǵan 11 túzetýmen zańdy Májiliske qaıtarý týraly sheshim qabyldandy. Soǵan sáıkes qylmystyq-atqarý júıesi mekemelerindegi beınebaqylaý júıelerin jáne ózge de múlikti qasaqana joıǵany nemese búldirgeni úshin, sondaı-aq, adam óziniń qyzmettik babyn paıdalanyp qylmys jasasa, qylmystyq jaýaptylyq qatańdatylyp, jazanyń balamaly túrleri alynyp tastalady. Bul norma qylmystyq-atqarý júıesiniń, tergeý ızolıatorlarynyń jáne ýaqytsha ustaý ızolıatorlarynyń qyzmetkerlerine qatysty ekenin atap ótken jón.
Odan bólek, ishki kóship-qonýdy yntalandyrý maqsatynda qonys aýdarýshylarǵa sharýa nemese ferma qojalyǵyn júrgizý úshin konkýrstan tys tártippen bes jylǵa deıingi merzimge jerdi jalǵa berý qarastyrylǵan. Zań «qandas» mártebesin berý rásimin jetildirýdi de kózdeıdi.
Sondaı-aq Palata otyrysynda senatorlar Álı Bektaev, Ásem Rahmetova, Ǵalıasqar Sarybaev, Lázzat Qaltaeva ózderiniń depýtattyq saýaldaryn joldady.