Alaókpe ataq

Buǵan deıin men elimizdegi eń dárejeli «Ataq» bolatynmyn... E, ıá, eńbegi sińgen, mańdaı teri tó­gilgen azamattarǵa beri­letin ókimettiń eń joǵary nagrada­larynyń biregeıi edim. Biregeıi dep otyrǵanym, anadaı eń myq­ty, myǵymy bolmasam da meniń de óz dárejem bar, kóp­shilik, ásirese ádebıeti bar, mádenıeti bar óner salasynyń óreli ataq-dárejesimin.

Alǵash atym belgilenip, jaryq juldyzdaı jarq etip el­diń mańdaıaldy azamattarynyń omyraýyna qadalǵanymdaǵy maq­tanysh sezimimdi jasyra almaımyn. Oıhoı, ol aza­matty kileń sen tur men ataıyn­dar quttyqtap, omyraý­da turǵan qalpymda aıaly alaqandarymen sıpap «Qutty bolsyn» degen­derindegi sátti áli umyta almaı­myn.

Basynda jylyna eki-úsh eren júırikke ǵana buıyryp, mártebem tasyǵan. Men buıyrar jyldyń mártebeli merekesin taǵatsyzdana kútetinmin.

Oıhoı, kóp ótpeı maǵan degen umtylys artyp, jylyna eki-úsh márte marapattalatyn dárejege jetip, bir berilgende onnan asa pendeniń omyraýyna taǵylatyn boldym...

Ne kerek, mine, bas-aıaǵy bes-alty jylda men kimge buıyr­madym deseńshi... Kim kóringenge baryp abyroıym azdy, bedel-qasıet quldyrady...

Oıpyr-aı, ónerge on qaınasa da sorpasy qosylmaıtyn omyraýyna taqqanda júzim jy­ǵylyp, el-jurtqa tike qaraý­dan qalyp, júnjip bittim... Al ana bir sahnaǵa keshe ǵana shyq­­qan tarsyl-taırań boz­ók­peniń meni omyraýyna taq­qandaǵy kirerge tesik qal­maǵan qalpymdy kórseń... Myna bir aýzynan bózi túsken saıqy­mazaqtyń qorlaǵanyn kimge aıtyp kór-jer bolamyn...

Al aqshanyń ashpas qulpy joq ekeniniń óz basym kýási boldym. Sol beıbaq meni qanshaǵa satyp alǵanyn aıtyp, qyrly úremkege matyryp, sýsynyn si­mirip baryp sýyryp alyp qaı­ta omyraýyna taqqandaǵy qor­lyqty dushpanyńnyń basyna bermesin...

Qudaı kóz jasymdy kór­gen bolýy kerek, aıym ońynan tý­yp, búgin meni almastyrǵan, menen dá­rejesi joǵary ataq bel­­gilengen qýanyshty habardy estip ólgenim tirilgendeı boldy... Qýanǵanymnan kelesi­lerge be­riletin jerde jatqan jerimnen atyp turyp eń alǵashqy bolyp álgi sabazdy «shyn nıetimmen» qut­tyqtap, omy­raýyma basyp sát­tilik tiledim...

Berik SADYR