Tabıǵaty tartymdy, ónerkásipke qolaıly óńir Almaty oblysynyń ınvestısııalyq tartymdylyǵy ýaqyt ótken saıyn joǵarylap keledi, dep jazady Egemen.kz.
Apta basynda aspanasty eliniń Ile-Qazaq avtonomııalyq oblysynyń iskerlik birlestiginiń 70 ókili Qonaev qalasyna keldi. Olar otandyq kásipkerlermen ekijaqty yntymaqtastyq qurýǵa qyzyǵýshylyq tanytyp otyr.
Almaty oblysynyń ákimdiginde alqaly jıyn ótip, onda ózara tıimdi yntymaqtastyq pen ekonomıkanyń túrli salalaryndaǵy jobalardy birlesip júzege asyrýdyń keleshegi talqylandy. Onda týrızm, aýyl sharýashylyǵy jáne qurylys salalaryna erekshe kóńil bólindi. Kezdesýge qatysýshylar seriktestikti keńeıtý jáne osy salalardy damytýǵa baǵyttalǵan naqty bastamalardy júzege asyrý múmkindikterin ortaǵa saldy.
ShUAR Saýda-ónerkásip palatasy basshysynyń orynbasary Tursynjan Muhatuly óz sózinde, Almaty oblysynyń kásipkerleri men Qytaıdyń Ile-Qazaq avtonomııalyq aımaǵy bıznes-qaýymdastyǵy ókilderi arasyndaǵy yntymaqtastyqtyń keleshegi zor ekenine senim bildirdi. Ol óńirdiń ınvestısııalyq tartymdylyǵynyń joǵary deńgeıi ekonomıkanyń túrli salalarynda, birlesken jobalardy júzege asyrýǵa qolaıly alań týǵyzatynyn basa aıtty. Sondaı-aq óńirde týrızm, aýyl sharýashylyǵy jáne qurylys salalarynyń belsendi damýy ınvestısııa men ózara tıimdi yntymaqtastyqqa keń múmkindikter beretinin de atap ótti.
О́z kezeginde Almaty oblysy ákiminiń keńesshisi Aıbar Temenov, Qazaqstan men Qytaı arasyndaǵy uzaq merzimdi qarym-qatynastardyń joǵary deńgeıin, tabysty júzege asyrylǵan jobalardyń sanymen rastalǵanyn atap ótti.
«Jyl saıyn ózara tıimdi baılanys tek nyǵaıyp keledi, bul yntymaqtastyqty odan ári damytýǵa jáne eki eldiń bıznesi men ekonomıkasy úshin jańa perspektıvalyq múmkindikter jasaýǵa yqpal etedi. Almaty oblysy men Qytaıdyń Ile-Qazaq avtonomııalyq oblysy arasyndaǵy áriptestikti ózara keńeıtý aımaqtar arasyndaǵy ekonomıkalyq baılanysty nyǵaıtýǵa septigin tıgizetinine senimdimin», dedi Aıbar Temenov.