Úkimet otyrysynda Tótenshe jaǵdaılar vıse-mınıstri Baýyrjan Syzdyqov elimizdiń batysynda Reseıdiń Irıklınsk sý qoımasynan Jaıyq ózenine sýdyń aǵýyna baılanysty jaǵdaı kúrdelene túskenin, soltústikte sý kóterilip jatqanyn aıtty, dep habarlaıdy Egemen.kz.
«Búginde 5 myńnan astam turǵyn úı, 16 myńnan astam saıajaı men 1 myń aýla aýmaǵy, 91 ǵımarat sý astynda qalyp otyr. 10 oblysta jergilikti aýqymdaǵy 41 tótenshe jaǵdaı jarııalandy. Qazir Abaı jáne Pavlodar oblystarynyń 3 aýdanynda TJ rejımi alyndy», dedi ol.
Sý tasqynyn joıý jumystary bastalǵannan beri shamamen 11,6 mıllıon tekshe metr erigen sý sorylyp, 5 mıllıonnan astam qap tóseldi.
«Qutqarý jáne shuǵyl jumystar kezinde jańa ádister men tásilder alǵash ret engizildi. Mysaly, Aqtóbe jáne Soltústik Qazaqstan oblystarynda ponton kópirlerin ornatý, qysqa merzimde sý burý arnalaryn salý. Bul kólik baılanysyn qamtamasyz etýge jáne sý basý qaýpin azaıtýǵa múmkindik berdi. Zardap shekkenderdi evakýasııalaý jáne ornalastyrý boıynsha barlyq máseleler sol jerde jedel sheshiledi. Qutqarýshylar bosanǵan áıelderdi qutqarǵan jaǵdaılar boldy, olardyń barlyǵy aýrýhanalarǵa aman-esen jetkizildi», dedi Baýyrjan Syzdyqov.
Ieleri tastap ketken janýarlar da qıyndyqta qalǵan joq.
«Keıbir azamattar úılerinen ketkisi kelmedi, kelissóz júrgizip, olardy kóndirý úshin kóp ýaqyt qajet boldy, biraq evakýasııalaý kezinde múgedekter, qart adamdar men áıelderge basymdyq berildi. Jalpy, sý tasqyny aımaqtarynan barlyǵy 119 myńnan astam adam evakýasııalandy, olardyń 44 myńnan astamy balalar boldy, búginde sýdy joıýǵa 32 myńnan astam adam, 5 myńǵa jýyq tehnıka, 310 sý kóligi jáne 13 tikushaq jumyldyryldy», dep atap ótti Syzdyqov.
Onyń aıtýynsha, búginde ákimdikter materıaldyq shyǵyndy sanap, turǵyndarǵa ótemaqy tólep jatyr. Sý qoımalaryna táýlik boıy monıtorıng júrgizilip jatyr.