Qazaqstan, Ýkraına jáne Chehııa polısııasy ınternet-alaıaqtardyń eki transulttyq qylmystyq tobyn anyqtady, dep habarlaıdy Egemen.kz Polisia.kz saıtyna silteme jasap.
Kıberqylmysqa qarsy is-qımyl sheńberinde IIM qyzmetkerleri jedel-izdestirý is-sharalaryn júrgizip, ınternet-alaıaqtyqqa sheteldik azamattardyń qatysy bar ekenin anyqtady.
«Mınıstrlik qyzmetkerleri qyzmettik issapar barysynda Ýkraına Ulttyq polısııasymen jáne Chehııa polısııasymen birlesip, ınternet-alaıaqtardyń eki transulttyq qylmystyq tobynyń áreketine tosqaýyl qoıdy», dedi departament bastyǵy - IIM resmı ókili Shyńǵys Alekeshev.
Dálirek aıtsaq, Zaporoje qalasynda alaıaqtardyń eki call-ortalyǵy joıyldy. Kıberqylmyskerler ózderin bankter men quqyq qorǵaý organdarynyń qyzmetkerleri retinde tanystyryp, Qazaqstan azamattaryna qońyraý shalyp, olardyń shottarynyń derekterin alýǵa tyrysqan.
«Nátıjesinde 9 adam ustaldy. 17 kompıýter, 62 mobıldi qurylǵy, sondaı-aq 35 gramm «metadon» preparaty tárkilendi. Odessa qalasynda úsh alaıaqtyq call-ortalyq taratyldy. Qaskóıler jalǵan ınvestısııalyq kompanııalarǵa qarjy salý syltaýymen ınternet-alaıaqtyq jasaǵan. Munda 23 adam ustaldy. 9 kúdikti ýaqytsha ustaý ızolıatoryna qamaldy. 8 avtokólik, 58 noýtbýk, 52 smartfon, 100-den astam sim-karta, sondaı-aq 200 myń AQSh dollarynan astam somaǵa sıfrlyq aktıvter tárkilendi. Qazirgi ýaqytta tergeý jáne jedel-izdestirý amaldary júrgizilip jatyr», dedi IIM resmı ókili.