Kólik mınıstrligi jáne «QazAvtoJol» UK» AQ bastamasy boıynsha respýblıkalyq mańyzy bar avtomobıl joldary sapasyn tekserý boıynsha keń aýqymdy «Halyqtyq baqylaý» jobasy iske qosyldy. Atalǵan joba qoǵamnyń elimizdegi jol nysandary sapasyn arttyrýǵa belsendi qatysýǵa baǵyttalǵan, dep habarlaıdy Egemen.kz Kólik mınıstrligine silteme jasap.
Bul – salynyp jatqan respýblıkalyq mańyzy bar avtomobıl joldary boıynsha elimizdiń árbir azamatyn qoǵamdyq baqylaýǵa shaqyrýdy maqsat tutqan joba. Anyqtalǵan kemshilikterge jáne máselelerge den qoıatyn Kólik mınıstrligi olardy qysqa merzimde sheshýdi kózdeıdi.
«Jobaǵa qatysý úshin 1403 baılanys ortalyǵyna habarlasyp, ótinim qaldyrý kerek. Tirkeý kezinde aty-jónin, baılanys nómirin, sondaı-aq turǵylyqty eldi meken men oblysty kórsetý qajet», delingen habarlamada.
Nysandardy aralaý kestesin «QazAvtoJol» UK» AQ www.qaj.kz resmı saıty arqyly kórýge bolady.
«Halyqtyq baqylaý» jobasy respýblıkalyq mańyzy bar avtomobıl joldaryn barlyq jol qozǵalysyna qatysýshy úshin qaýipsiz ári sapaly etýge arnalǵan.