Sý basqan aımaqtaǵy aǵaıynǵa alaqandaǵysymen bólisip, jomarttyq jasap jatqandardyń qatarynda Qarasaı aýdanyna qarasty Qyrǵaýyl eldi mekeniniń turǵyndary da bar, dep habarlaıdy Egemen.kz.
Aırandaı uıyp otyrǵan aýyl turǵyndary sý tasqynynan zardap shekken óńirge gýmanıtarlyq kómek kórsetýge asyqty. Osy maqsatpen Qyrǵaýyl aýylynyń ortasyna qoıylǵan júk kóligin qarapaıym halyq az ýaqyttyń ishinde-aq kıim-keshek, kórpe-jastyq, turmysqa qajet zattarmen, azyq-túlikpen toltyryp tastaǵan. Bul iste kásipkerler de kósh basynan kóringen. Júrek jylytar ıgi iske aýyl ımamy Turar Úsenovtiń uıytqy bolǵanyn ataý lázim.
«Sý basqan óńirlerdegi baýyrlarymyzdyń basyna túsken qıyn-qystaý shaqta shama-sharqynsha kómek kórsetýge aýylymyzdyń úlken-kishisi nıet etip, bir úıdiń balasyndaı atsalysty. Sonyń ishinde turǵyndarǵa qyzmet kórsetip otyrǵan «MarMara» dúkeniniń ıeleri bir mıllıon teńgeniń kóleminde kıim-keshek alyp berdi. Bul – bizdiń yntymaǵymyzdyń, birligimizdiń belgisi. Endigi maqsatymyz – aýyl azamattarynyń amanatyn tıisti jerge jetkizý», deıdi aýyl ımamy.
Jınalǵan zattar poıyzǵa tıelip, Soltústik Qazaqstan oblysyna jóneltildi.
«Aıtyp kelmeıtin apattan zardap shekken azamattarǵa az da bolsa kómegimiz bolsyn degen nıetpen aýyldastar túgelge jýyq qolymyzdan kelgen úlesimizdi qostyq. Tasqynnyń beti qaıtyp, el-jurt qalypty tirshilikke oralsa eken degen tilegimiz bar», deıdi aýyl turǵyny Ǵalııa Estaeva.
Almaty oblysy