Qazaq halqy almaǵaıyp zamanda shartaraptan bas saýǵalaǵan, taǵdyr tálkegimen bosyp kelgen ózge jurtty baýyryna basty. Qolyndaǵy barymen bólisti, basqanyń qaıǵysyna ortaqtasty. Mine, sol ult meıirimi búginde etnostyq tegine, dinine, diline qaramaı, eldiń barsha azamatynyń uıysýyna sebepshi boldy. Tipti qazaq jerinde dúnıege kelip, ıakı belgili bir ýaqyt ómir súrgen, kóńilinde jylý qalǵan sheteldikter ulyq merekelerimizdi umytqan emes.
Máselen, álemniń túkpir-túkpirinde júrgen burynǵy jerlesterimiz Naýryz meıramyn qadirlep, básin bıik qoıady. Onyń biri – Germanııa turǵyndary. Olar jyl saıyn Ulystyń uly kúnin Berlınde atap ótedi. Bıyl da dástúrden jańylmaı, sol aýmaqtaǵy 10 memlekettiń elshiligi birlesip uıymdastyrǵan. Jıylǵan jurt biraýyzdan «Qazaq halqynyń darqan kóńilin, jyly júregin, ulttyq meıramyn, tipti keıbir qundylyqtaryn jadymyzdan shyǵarmaımyz», deıdi.
Izgiliktiń kórinisi bolǵan is-shara Berlındegi etnologııalyq murajaıda uıymdastyrylypty. Merekeni dáriptegenderdiń arasynda Ortalyq Azııa elderi, Ázerbaıjan, Aýǵanstan, Iran, Pákstan, Túrkııa bar. Kelgen qonaqtarǵa mol dastarqan jaıylyp, ár memleket óziniń salt-dástúri men mádenıetin keńinen tanystyrdy. Bir baıqaǵanymyz, sheteldikter bizdiń elshilik tikken kıiz úıge erekshe qyzyǵýshylyq tanytty. Sýretke túskenderdiń de qarasy qalyń. Sondaı-aq ár el ózderiniń mýzykalyq baǵdarlamasyn da usyndy. Jınalǵan halyq áz Naýryzdyń qalaı toılanatynyn kórip, elimizdiń salt-dástúrimen jaqyn tanysyp, qazaq halqyna degen qyzyǵýshylyǵy odan saıyn artqanyn aıtty.
Elden ketse de, kóńilinde jylý qalǵan sheteldikter jyl saıyn izgi tilekterin bildirip jatady. Al bıyl halyqtyń júregine shýaq túsirgen beınejazba áleýmettik jelide jeldeı esti. Bul – Aqmola oblysynan Germanııaǵa kóship barǵan nemis otbasynyń Naýryz meıramymen quttyqtaýy. Onda Qyzylsaıa aýlynyń týmalary Bokı Pavel jáne zaıyby Irma Germanııa memleketinen sálem joldaǵan. Júzderi kúlimdegen olar «Men Bokı Pavel Ivanovıchtiń balasymyn. Zerendi aýdanynyń Qyzylsaı aýlynda týdym. 1996 jyly Germanııaǵa kóship kettik. Sizderdi Naýryz merekesimen quttyqtaımyz. Sizder anda, biz mynda aman bolaıyq! Aspanymyz ashyq bolsyn!» degen.
Germanııanyń alǵashqy «Plus Size» arýy Dına Vakker elde turǵanynda Naýryzdy únemi toılaǵanyn esine alyp, lebizin bildiredi.
«Biz Qazaqstanda ómir súrgen kezimizde, árıne, Naýryzdy atap óttik. Ol kezde bári keń kólemde ótetin edi: alańdarda kıiz úıler men shatyrlar qoıylady, kóptegen dámdi taǵam daıyndalady, búkil halyq birigedi. Áserli áýez barlyq jerden estilip, qýanyshtyń jeli esedi. Esimde, halyq tipti kópqabatty úılerdiń aýlalarynda da toılaıtyn edi. Biz munda qazaqtyń ulttyq taǵamdaryn týǵan jerdi saǵynǵan kezde daıyndaımyz. Baýyrsaq, et, manty, laǵman, palaý, samsanyń dámi áli aýzymnan ketpeıdi. Dástúrler men ulttyq taǵamdar aralasqan kópultty jáne kópmádenıetti eldi eshqashan umytpaımyn», dedi ol.
Edýard Kekseldi bizdiń halyq jaqsy biledi. Ol – erejesiz jekpe-jekten boksshy, Aqmola oblysynyń týmasy. Buqaralyq aqparat quraldaryna bergen suhbattarynda bizdiń eldiń atyn jıi aıtyp, alǵysyn bildirip jatady. Tipti bir jeńisin Qazaqstanǵa arnap, týymyzdy jamylyp shyqqany da bar.
«Men Kýrskoe aýlynda turdym. Alaıda búkil qazaq eli sııaqty bizdiń aýyl da Naýryzǵa erekshe kózqaraspen qaraıtyn. Mol dastarqan jaıylyp, jármeńkeler, merekelik konsertter, túrli konkýrs, sporttyq jáne bı jarystary ótkiziletin. Kóńildi, qyzyqty bolatyn. Naýryz – kóktem men qaıta órleý merekesi. Biz áli de Naýryz merekesinde týystarymyzben dastarqan basyna jınalamyz», dep esteligin aıtty sportshy.