Túrkistan oblysy Keles aýdanynyń prokýrorlary balabaqshalardyń qaýipsizdigin teksere bastady. Olar atalǵan mekemelerdegi beınebaqylaý kameralarynyń jazbalaryn taldap, qylmystyq is qozǵaýǵa negiz bolǵan zań buzýshylyqtardy anyqtady, dep habarlaıdy Egemen.kz.
24.kz habarlaǵandaı, aýdannyń tórt balabaqshasynda balalarǵa qol kóterý faktisi anyqtaldy. Máselen, mektepke deıingi mekemelerdiń birinde qyzmetker balalardy eden jýatyn jabdyqpen urǵan. Endi ol 3 jylǵa bas bostandyǵynan aıyrylýy múmkin.
Sonymen qatar prokýratýra qyzmetkerleri balalardyń as mázirin tekseredi.
«Mektepke deıingi mekemelerde júrgizilgen tekseris jumystary ár balanyń quqyǵyn saqtaýǵa, qaýipsizdigin arttyrýǵa múmkindik beredi. Qazirgi tańda 97 balabaqshanyń tek altaýynda tekserý júrgizilip, 20 kúnde úsh maman toby quryldy. Tıisti jumystar áli de jalǵasady», dedi Keles aýdanynyń prokýrory Nurlan Eshenqulov.