Joǵarǵy Sotta JS tóraǵasy A.A.Merǵalıevtiń tóraǵalyǵymen ómir boıyna bas bostandyǵynan aıyrýǵa sottalǵan A.J.Toǵaevqa qatysty qylmystyq is kassasııalyq tártipte qaraldy. Otyrys sottalǵan A.Toǵaevtyń, onyń qorǵaýshysy-advokattyń qatysýymen, sondaı-aq onlaın rejıminde qatysqan jábirlenýshiniń ókiliniń qatysýymen ótti. Bul týraly Joǵarǵy Sottyń baspasóz qyzmeti habarlady, dep jazady Egemen.kz.
Memlekettik aıyptaýdy Bas prokýrordyń orynbasary Á.Q.Shyńdalıev qoldady.
Osy jyly aqpan aıynda Toǵaev ózine qatysty sot aktilerin qaıta qaraý, óziniń is-áreketterin saralaýdyń durystyǵyna, sondaı-aq jazalaý sharasyna daý aıtyp, ótinishhat bergen.
Qaraý nátıjesinde Joǵarǵy Sottyń sot alqasy sot aktilerin ózgerissiz qaldyrý týraly sheshim shyǵardy, sottalǵannyń ótinishhaty qanaǵattandyrylǵan joq.
Is materıaldarynan anyqtalǵandaı, 2014 jylǵy 25 maýsymdaǵy sot úkimimen Toǵaev tonaý jáne bandıtızmmen baılanysty kisi óltirý, shabýyl jasalǵan adamnyń ómirine nemese densaýlyǵyna aýyr zııan keltiretin qaýipti zorlyq-zombylyqpen baılanysty tonaý, sondaı-aq turaqty qarýly top qurý kezinde, uıymdasqan toppen, qarýdy qoldanýy, uıymdasqan toptyń turǵyn úı-jaılarǵa zańsyz kirý arqyly asa iri kólemde qylmys jasaǵany úshin kináli dep tanyldy.
Toǵaev kásipkerlikpen aınalysatyn azamattarǵa qarýly shabýyl jasaý maqsatynda qylmystyq top quryp, sybaılastarymen birge erli-zaıyptylardyń úıine basyp kirgeni anyqtaldy.
Sosyn sottalýshylar jábirlenýshini óltirip, odan keıin onyń áıelin baılap, aýyr dene jaraqatyn keltirip, olardan ózderinde bar aqsha men baǵaly zattardy berýdi talap etken.
Talap etkenderin alǵannan keıin olar qylmys ornynan boı tasalaǵan.
Toǵaevtyń kinási sottalǵandardyń moıyndaýlarymen, jábirlenýshiniń, kýálardyń aıǵaqtarymen, sot-medısınalyq-bıologııalyq saraptamalardyń qorytyndylarymen, oqıǵa bolǵan jerdi qaraý nátıjelerimen, tárkileýmen ishinara dáleldendi.
О́mir boıyna bas bostandyǵynan aıyrý túrindegi taǵaıyndalǵan jaza jasalǵan is-áreketterdiń qoǵamǵa qaýiptiligin, áreketinde qylmystyń qaýipti qaıtalanýyn quraıtyn buryn sottalǵan Toǵaevtyń jeke basyn jáne sońǵysynyń asa belsendi qylmysty rólin eskere otyryp, zańdy, negizdi jáne ádil bolyp tabylady.