Antıkor Astanada avtokólikterdi zańsyz tirkeýmen aınalysqan qylmystyq topty ustaýdyń vıdeosyn jarııalady, dep habarlaıdy Egemen.kz.
Buǵan deıin Astana qalasynyń qylmystyq ister jónindegi mamandandyrylǵan aýdanaralyq soty arnaıy HQKO qyzmetkerlerine, polısııa qyzmetkerlerine jáne azamattyq tulǵalarǵa qatysty úkim shyǵarǵan edi. Olar uıymdasqan top quryp, topqa basshylyq etken, memleketke múliktik zalal keltirgen.
Antıkordyń habarlamasynda: «2022 jyldyń qańtarynan mamyryna deıin qylmystyq top shetelden ákelingen 462 avtokólikti zańsyz tirkegen. Memleketke keltirilgen jalpy shyǵyn 1,2 mıllıard teńgeni quraıdy. Sot úkimimen 32 adam sottaldy, sonyń ishinde qylmystyq toptyń uıymdastyrýshylary – Astana qalasynyń №2 mamandandyrylǵan HQKO basshysy Sh.Bókebaev pen Astana qalasynyń mamandandyrylǵan HQKO mamandary A.Tam-Ogly jáne H.To-ogly 9 jylǵa bas bostandyǵynan aıyrý jazasyna kesildi. Toptyń bes múshesi 6 jylǵa bas bostandyǵynan aıyrý túrindegi, al 17 «kómekshi» bas bostandyǵynan aıyrý jáne shekteý túrindegi jazaǵa tartyldy», delingen.
Sondaı-aq jeti qyzmetker 2 jyl 6 aıdan 3 jyl 6 aıǵa deıin bas bostandyǵynan aıyryldy. Olar arnaıy ataqtarynan jáne ómir boıy memlekettik qyzmette eńbek etý quqyǵynan aıyryldy.
Úkim zańdy kúshine engen joq.