Oral qalasyndaǵy Nazarbaev zııatkerlik mektebiniń oqýshylary ǵaryshtyq zertteýler baǵytyndaǵy halyqaralyq saıysta júlde aldy. Jas ónertapqyshtar jasaǵan «Atlas» apparatyna qazylar alqasy erekshe qyzyǵypty.
«Ǵylym álemin ashamyz» dep atalatyn jobalar saıysy sáýir aıynyń sońǵy kúnderi Astana qalasynda ótken edi. Baıqaýǵa aldyn ala irikteýden ótken 94 oqýshy qatysyp, baq synaǵan.
Oraldaǵy zııatkerlik mekteptiń 11-synyp oqýshylary Mahambet О́tepqalı men Nursultan Zınýllın «Kún júıesi» seksııasy boıynsha saıysta 2-orynǵa ıe boldy. Al 9-synyp oqýshysy Qaıdar Moldash «Ǵaryshtyq aqparattyq tehnıkalar jáne modeldeý» baǵytynda 2-oryndy ıemdendi. Jas ónertapqyshtardy ustazdary О́mirǵalı Moldashev, Elmıra Mýsaǵalıeva, Medet Bısekenov baýlyǵan eken.
– Men ǵaryshkerlerge túrli jattyǵý jasatyp, zertteý júrgizetin qondyrǵy jasadym. Bul qondyrǵy ǵaryshkerlerdiń kez kelgen jaǵdaıda ózin jaıly sezinýin, túrli sátte óz reaksııasyn qalpynda ustaýyn qamtamasyz etedi, – deıdi jas ónertapqysh Qaıdar.
Al Mahambet pen Nursultannyń jumysy – «Atlas» ǵaryshtyq zertteý apparaty dep atalady. Bul joba planetaaralyq keńistikti, olardyń tabıǵı serikterin zertteýge arnalǵan eken. Sondaı-aq bul apparat ǵarysh keńistiginde túrli fızıkalyq, hımııa-bıologııalyq tájirıbe júrgize alady. Jobanyń bortyndaǵy túrli zertteý qurylǵysy, jasandy ıntellekt qondyrǵysy jáne alýan jasýsha salynǵan kapsýlalar qazylar alqasynyń aıryqsha qyzyǵýshylyǵyn týdyrypty.
Batys Qazaqstan oblysy