Shymkentte «Taza Qazaqstan» respýblıkalyq ekologııalyq aksııasy aıasynda «О́negeli urpaq» aptalyǵy bastaldy. Apta boıyna megapolıste kóptegen tazalyq is-sharalary qolǵa alyndy.
Aptalyq aıasynda qaladaǵy «Abaı saıabaǵynda» «Urpaqtar sabaqtastyǵy» ataýymen ata men nemereleriniń tazalyq aksııasy ótti. Osyndaı úlgi men danalyqty dáriptep, keıingi jas urpaqtyń boıynda tabıǵatqa, qorshaǵan ortaǵa degen janashyrlyq, qamqorlyq sezimderin qalyptastyrý maqsatynda uıymdastyrylǵan is-sharaǵa O.Rahmanberdıev, Sh.Myrzahmetov, K.Tólebaev, B.Turǵaraev, Q.Syzdyqov sekildi qaladaǵy birqatar memleket jáne qoǵam qaıratkerleri, eńbek ardagerleri qatysty. Jalpy, «Urpaqtar sabaqtastyǵy» aksııasyndaǵy jumystarǵa 500-ge jýyq adam atsalysyp, saıabaq ishin tazalap abattandyrdy.
– «Taza Qazaqstan» bastamasy aıasynda shaharymyzda kóptegen ıgi is jalǵasyn taýyp jatyr eken. Sonyń biri – «О́negeli urpaq» aptalyǵy. Osyǵan oraı nemerelerimizben birge saıabaqqa kelip, tazalyǵyna úles qosyp jatyrmyz. Bizdiki – ósip kele jatqan balalarymyzǵa, jastarǵa ónege, úlgi bolsyn degen nıet. Jastardyń úlkenderge, qarııalarǵa kómek kórsetkeni, ıgi isterge muryndyq bolǵany qandaı jarasymdy. О́z basym aksııa uıymdastyrýshylaryna alǵysymdy bildiremin, – dedi abyz aqsaqal O.Rahmanberdıev.
Tazalyq jumystary barysynda megapolıstiń eńbek ardagerleri turyp jatqan úılerdiń aýlalary tazalandy, shóbi otalyp, aǵashtar áktelip, qoqys qaldyqtary syrtqa shyǵaryldy. Osynaý aksııa kezinde Shymkent qalasy ákiminiń orynbasary Sársen Quranbek bastaǵan bir top belsendi jas, eriktiler Ekinshi dúnıejúzilik soǵys ardageri Nına Mosýnovanyń shańyraǵynda bolyp qaıtty. Jastar aýlany tazartyp, aǵash túpterin qopsytyp, qorshaýlardy syrlady. Osy tusta aıta ketken jón, shaharda búginde kózi tiri eki soǵys ardageri ǵana qaldy. Sonyń biri – Nına Mosýnova. Qarııa bıyl 100-ge kelip otyr. Ol 1942 jyly áskerge óz erkimen attanyp, Mojaısk mańyndaǵy soǵysta qolyna pýlemet alyp, jaýǵa qarsy shyqqan. Soǵystan soń kassır, kitaphanashy, hatshy-mashınıstka bolyp qyzmet istegen. Qarııanyń 2 nemere, 5 shóberesi bar.
– Búgingi urpaqqa beıbit ómir syılaǵan soǵys jáne tyl ardagerleriniń erligin baǵalaý – halqymyz úshin paryz. Biz – ardagerlerimizdi ardaqtap, qarttarymyzdy qadirleıtin halyqpyz. Endigi mindetimiz – kózi tirisinde osy kisilerge barynsha qamqorlyq jasap, kómegimizdi aıamaý. Sondyqtan Sizge jeńis pen búgingi beıbit kúnderimiz úshin alǵys aıtamyz, – dedi qala ákiminiń orynbasary S.Quranbek.
Nına ájeı qala ortalyǵyndaǵy alaqandaı úıde nemeresiniń qamqorlyǵynda turyp jatyr. Kómekke kelgen jastarǵa rızashylyǵyn aıtyp, tipti kózine jas alyp qaldy. Otan úshin otqa túsip, qan maıdannan jeńispen oralǵany, búgingi beıbit kúnderdi kórgeni úshin taǵdyrǵa basyn ıedi. «Endi soǵys degen zulmatty jastar kórmesin. Elimizde tek beıbitshilik bolsyn», dedi qart ana tilegin arnap.
«О́negeli urpaq» aptalyǵy «Meniń mektebim» atty jobaǵa jol siltedi. Sonyń aıasynda joǵary synyp oqýshylary mektep aýlasyna aǵash kóshetterin otyrǵyzdy, mektep aýlasyn tazalap, gúl ekti. Buǵan qosa «Túlekter alleıasy» aksııasy barlyq bilim berý mekemeleri úshin jaqsy dástúrge aınalyp keledi.
Bul tek qoǵamdyq paıdaly jumys emes, oqýshylardyń óz mektebin, týǵan qalasyn kógaldandyrýǵa qosqan úlesi dep qabyldaǵan jón. Sonymen qatar mektep oqýshylary «О́negeli urpaq» aptalyǵynda ardagerler men qarttardyń úı aýlasyn tazalap berdi. Uıymdastyrýshylar tazalyq aksııasynyń oqýshylardy ekologııalyq mádenıetti qalyptastyrýǵa, tabıǵatqa uqypty qaraýǵa, eńbekqorlyqqa, qorshaǵan ortany taza ustaýǵa baýlıtynyn aıtady.