Sý resýrstary jáne ırrıgasııa mınıstrligi Batys Qazaqstan oblysyndaǵy iri sýarý-sýlandyrý júıesine 400 mln tekshe metr tasqyn sýyn jiberdi, dep habarlaıdy Egemen.kz vedomstvonyń baspasóz qyzmetine silteme jasap.
Jaqyn arada Jaıyq-Kóshim sýarý júıesine taǵy 200 mln tekshe metr sý jiberý josparlanyp otyr. Bul 65 myń gektardan astam shabyndyq jeri men jazǵy jaıylymdardy sýmen qamtamasyz etýge, sondaı-aq júıe boıynda ornalasqan sý qoımalaryn toltyrýǵa múmkindik beredi.
Sondaı-aq sońǵy jyldary keýip qalǵan Batys Qazaqstan oblysynyń Edilsor, Jaltyrkól, Birqazan, Sorkól, Saltanat jáne basqa da sý aıdyndaryna sý jiberý jumysy júrip jatyr.
«Aldaǵy mindet - aýylsharýashylyǵy men ónerkásipte odan ári paıdalaný úshin tasqyn sýyn sý qoımalaryna jınaý. Kóptegen aımaqtardaǵy iri sý qoımalary 100% toly, biraq bul tolyp ketý jáne sý basý qaýpi bar degendi bildirmeıdi. Normadan asatyn sý qaýipsiz kólemde ózender men kanaldarǵa jiberilip, aýylsharýashylyǵy men ónerkásipte paıdalanylady», dep túsindirdi Sý resýrstary jáne ırrıgasııa mınıstri Nurjan Nurjigitov.